2018-06-29

සාර්ථක කළැමණාකරුවෙක් වීමේ පළවෙනි අඩිතාලම



අහවල් සින්සියර් සමාගමේ හලාවත ශාඛාවේ කඩිනමින් පිරවීම සදහා ඇබෑර්තු.ඔබත් කළමණාකරුවෙකු වී 50,000ට වැඩිය උපයන්න.පුහුණුවෙන් පසු විදේශ සංචාර"

ආර්ථික අවපාතයකට ලක් වී තිබ්බ ගෙදරින් පිටවෙන්නෙ කවද්ද කියල හිතන් ඉන්න සන්ධියෙ ඔන්න ඔහොම ඇඩ් එකක් දැක්ක පත්තරේ. සා.පෙළ කරල ගෙදර ඉන්න කාලෙ.අනිත් එවුන් ටියුෂන් ගියත් මට සල්ලි දෙන්න කවුරුත් හිටියෙ නැතිකොට මම එක හිතින් හිතා ගත්ත කළමණාකරුවෙක් වෙල හෙන පිරිසක් පාලනය කරන ටයි පොල්ලක් එල්ලගත්ත කාර් එකක යන බඩ මහත ඩෑල් එකක් වෙන්න.පස්වනක් ප්‍රීතියෙන් පිනා ගියපු මම සෙනිකව සයිකල් කට්ටයි පත්තරෙයි අරන් ටවුමට බඩ ගෑව.ටවුමෙ කොමියුනිකේෂන් සේවා සපයන කඩෙන් ගත්ත කෝල් එකක්.හලාවත අහවල් මාවතේ තට්ටු 2 බිල්ඩින් එක කීව.දැන් හෙන සෙටිස්.පහුවදාම කුලීවැඩ ටිකක් සෙට් කරන් ගතමනාව හොයාගෙන ගෙදරට කීව රස්සාවකට යනව කියල.ගෙදරිනුත් උන්නත් දාහයි මලත් දාහයි නිසා කියාපු දවසෙ කුකුලත් අතේ අරන් හලාවතට නැව් නැග්ග එකල පදිංචිය වුන රජරට රාජධානියේ අඹන්පොල සිට.

හලාවත කුරුණෑගල පාරේ අහවල් ප්‍රනාන්දු මාවතේ තැන හොයාගන්න මහ වෙලාවක් ගියෙ නෑ.ඩිජිටල් ප්‍රින්ට් එකක් ගහපු පට්ට පරණ ගොඩනැගිල්ල දැක්කම හිත කඩන් වැටුනෙ සුනාමියකට අහුවුන බිල්ඩිමක් වගේ.කමක් නෑ ඕන මගුලක් කියල හිතන් ඇතුලට ගියාට දොර වහල.කමක් නෑ ටිකක් ඉමුකො කියල හිතනකොටම ඔන්න ලේඩිස් බයිසිකලයක් පැදන් ඩෑල් එකක් ආපි දත් 42ක් විතර එලියට දාල හිනා වේගන.බලාපුවාම පොරලු කළමණාකාර තැන.හත් ඉලවුවට ගහපු කලාබරේ කීවලු ඇගත් හීතල වුනා මේ මොන කෙංගෙඩියක්ද ඔලුවට කඩන් වැටුනෙ කියල.කමක් නෑ ආපු එකේ ඕන මගුලක් කියල එල්ලුම් ගහට ගිය සූර සරදියෙල් වගේ ඉන්ටවීව් එකට තිබ්බ කබල් මේසෙ ගාව ප්ලාස්ටික් පුටුවෙ වාඩි වුනා.

පොර සෙනිකව මගෙ ඔලුව හෝදල දැම්ම හාපික් අධි සාන්ද්‍රණයක් දාල.ඊට පස්සෙ හිටෙව්ව කළමණාකාර බීජ එසැනින්.ඔල්මොරොන්දම් වෙලා හිටපු මන් එලියට ආවෙ කළමණාකරුවෙක් වගේ ගාම්භීර අඩි තියමින්.ඒ තරම් හෙන බුද්දිමත් ඈ ඒ කාලෙ.ගෙදර ගියපු මම රෙදි කබල් ටිකත් අරන් සෙනිකව හලාවතට මාරු.හම්මට හුඩු ආවම තමා දන්නෙ මේකෙ කරන්න තියෙන්නෙ ටයි පොල්ලක් දාල බඩු මල්ලක් කරේ තියන් ගෙයින් ගෙට ගිහින් අලෙවිය කළමණාකරනය කරන්න තියෙන්නෙ.කමක් නෑ ගෙදරට දීල ආව ටෝක්ස් හැටියට ආය රෙද්දක් ඇදන් ගෙදරට සම්ප්‍රාප්ත වෙන්න බෑ පිංවතුනි.එහෙම්ම සාර්ථක කළැමණාකරුවෙක් වීමේ පළවෙනි අඩිතාලම දැම්මා.

පහුවෙනිද උදේ ලෑස්ති වුනා ෆීල්ඩ් එකට බහින්න.ඊට කලින් මීටිමක් කීව.දැන් මන් මීටිමේ හිටියට මෙලෝ දෙයක් තේරෙන් නෑ,උන් ඉංග්‍රීසි කෑලි වගයක් කිය කිය බෙරිහන් දෙනව.නායක යා නොහොත් කළමණාකරණ තැන මොනවදෝ අහනව බෙරිහන් දීල.අරුන් ඒකට උත්තර දෙනව බෙරිහන් දීල.අන්තිමට එකම වාක්‍ය කියල බෙරිහන් දෙනව සේරමල.නායක තැන මටත් ඇවිත් කියාපි උන් කියවන එකම කියන්න.මාත් කෑ ගහන්න පටන් ගත්ත බෝංචි ලීස් බෝංචි ලීස් කියල.බලාපුවාම උන් කියලතියෙන්නෙ "බෝර්න් ටු ලීඩ්" කියල.මන් දන්නවැයි ඔය කුණුහරුප

කොහොමින් කොහොමින් හරි මාස 6ක් ගෙවුන බඩු විකුණනකාලකන්නි මැනේජර් ජීවිතේ.මට තේරුණා මේක හරියන මගුලක් නෙවේ කියල.අවුරුදු නිවාඩුව එනකන් ඇගිලි ගැන ගැන හිටියෙ පඩිය අරන් මාරුවෙන්න.කොහොමහරි පඩිය ලැබුන කලින්ම.අපට කියල තිබ්බෙ බඩු කෑලි 10ක් විකුණන්න ඕනෙ කියල දවසට.ඊට අඩු වුන දවසට බලු බැනුම්.නොවිදිනා දුක් වින්ද.දැන් පඩියත් අතේ නිසා පැනගන්න සහතික ටික ගන්න පොටක් පෑදෙනකන්හිටියෙ.මුන් සහතික තියාගන්නා පැනල යන්න බෑනෙ එතකොට.කොහොම හරි අපිත් බඩු විකුණන්න ඕන බොරුවක් ගොතල ඇගේ ගහල එන්න තමා බලන්නෙ.දවසක් මමත් මාව ට්‍රේනින් කරපු නුවන් සර් කියන හිපාටුවත් දෙන්න බැස්ස වෙන්නප්පුවෙ වැල්ලට.කියන්න ඕනෙ නෑනෙ ආය වැල්ල ගැන.වැල්ලනම් කොහෙත් එකයි.සමහර අයනම් හිටිය හොද අය.ඒත් බහුතරයනම් කියල වැඩක් නෑ.අපි ගාව තිබ්බ පැගිරි තෙල් දාපු බාම් එකක් මදුරුවන්ට හොදයි කියල ඇගේ ගාන.වැල්ලෙ මේ බාම් එක විකුණුන මොකද වැල්ලෙ මැසි මදුරු කරදරය වැඩි නිසා.

අපිත් අලි කොටි එලවන්නත් බාම් එක හොදයි කියන සයිස් එකේ තමයි මේක මාකට් කරන්නෙ.වැල්ලෙ ටිකක් දුර ගියාම අපට තේරුනා අජපල් පොට් එකකට තමා ඇවිත් තියෙන්නෙ කියල.කමක් නෑ අවසාන ගෙවල් රොත්ත ඇතුලටත් රිංගල බිස්නස් එකක් කරගන්න ඕනෙ කියල අපේ හිපාටු නුවන් මාවත් ඇදගෙන ගියා.මට ඕකා උදේ හවස සර් පට්ටම අතට අරන් දෙන ටෝක් හින්ද ගේමක් දෙන්නෙ කවද්ද කියල හිත හිත ඉන්න සමය උදාවෙලා තිබුනෙ පින්වතුනි.ඔන්න ඉතින් වැල්ලෙ ගෙදරකට ගොඩවෙලා ලස්සන ඇක්ක කෙනෙක්ට මිස් අපි මේ අහවල් සින්සියර් කියද්දිම ගෙදර හිටපු මරුමුස් ඩයල් එකක් එලියට ඇවිත් ඔයාල ගාව නේද අර මැස්සන්ට මදුරුවන්ට ගාන්න කියල බාම් තියෙන්නෙ කියල අහපි.අපේ හිපාටු නුවන් සර් සතුටින් බැබලි බැබලි ගත් කටටම ආ ඔවු සර් කියාපි.

පොර ටිකක් ඉන්නකො කියල ගෙට ගිහින් ගෙනාපි නේද තඩි පොල්ලක්.එන පොට හොද නෑ.මම හෙමීට කඩුල්ල පැන්න.අරූ තාම එතන.සෙනිකව මම දැක්ක පොලුපාරක් එල්ල වෙනවා.ඊත් එක්කම මර හඩක් ඇහුනා.මම ඉතින් බඩු බෑග් එකත් එතනම දාල රණ මයුරා තමා ඉතින් ආය.පස්ස බැලිල්ලක්නම් නෑ.ගෙවල් අස්සෙන් දුවල දුවල බලද්දි මම ආයෙ ඇවිත් තිබ්බෙ නුවන් කාරයට තඩිබාන තැනට කිහාල්ලකො.දුවන ගමන්ම මම දැක්ක අරූව දණ ගස්සල.ඌට බඹරුඇනල වගේ ඉදිමිල පෝරියල් එකට.

මම හූවකුත් දාල ඌට මගෙ පස්සෙන් පන්නන ඉදල් අතු රැගත් ගෑනු සේනාවට අහු නොවී කොහොම හරි පාරට පැනල බෝක්කුවක් අස්සෙ හැංගුනා. එහෙම ඉද්දි එතනින් ගිය එකියක් කියනවා ඇහුන කතාවෙන් තමා මට මේ ගුටිකෑමේ හේතුව සක්සුදක් සේ පහැදිලි වුනෙ.අරූට නෙලපු පොරගෙ වයසක අම්මන්ඩිට අරු කලින් මදුරු බාම් එකක් විකුණල කැරපොත්තන්ටත් හොදයි කියල.උණුවතුරෙ දිය කරල ඉහින්න කීවලු.අනේ ඉතින් ලොක්කිත් ඒක උණුවතුරෙ දියකරල ඉහල.ඒකෙ තෙල් ගතිය නිසා ටයිල් පොලවෙ ලොක්කිව ලිස්සල වැටිල කොන්ද කඩිල අතකුත් එක්කම.ඒකෙ ගුටි පූජාව තමා පොරට සෙට් වුනෙ.මට ඉතින් ඉත සිතින් සතුටුයි.මටත් ඌ එක්ක තරහක් තිබ්බනෙ.

මම ශේප් එකේ ටයි එක ගලවල එලියට ඇවිත් එහෙමම ඔෆිස් එකට ආව.එද්දි සහතික අල්මාරියෙ යතුර මේසෙ උඩ.මැනේජරය ටොයිලට් එකේ.සෙනිකව ගත්ත සහතික ටික.ඇදුම් කඩමලු ටික එක්කම.පඩියත් අතේ එදා බිස්නස් සල්ලිත් අතේ.කොල්ල සෙනිකව මාරු රජරට රාජධානියටම.පළවෙනි රස්සාව ඔන්න ඔහොමයි නිමාවුනේ පින්වතුනි.තවමත් මතක් වෙනව බඹරු ඇනපු අරූගෙ මූන.



5 comments:

  1. අද දවසටම හිනාවෙන්න ඇති - බෝංචි ලීස්!

    ReplyDelete
  2. උඹත් ඔය මැසින් ඇටවිල්ල පැත්තක දාල ඒ වගේ ජොබක් හොයාගනිං. හැක්..

    ReplyDelete
    Replies
    1. මෙ යන සෙතේ හැටියට එහෙමවත් කරන්ඩ වෙනවා

      Delete

කමෙන්ට් වලට ලින්ක් දාන විදිහ
<a href="LINK HERE"> WORDS HERE</a>

Blog Archive

popular articles of today

Popular articles of this year

Always popular articles