කම්කරුවාගේ සයිබර් ආගමනය

අතමිට මුදල් යහමින් ගැවසුන                         දිනක

වසර දෙකක් පස්සට තුන්වෙනි                        මසක

අටමීත් එක්ක අටමා දොඩමලු                         විටක

කෙල්ලට වැඩක් වෙයි මතු ලොකු                උනදාක

කොරියා රටේ විසිකරනා කුණු          ගොඩට

අරගන ඇවිත් හරි ගස්සා                 සුපිරියට

විකුණන තැනක මම දන්නා              ලාබයට
ගත්තා එකක් හිනාව මගේ කන            ලගට

හතරුස් කොටහ බැදලා රෝදය                      අස්සේ

ටිවි පොජ්ජ ෂීට් එකේ පිටි                               පස්සේ

මීයත් එක්ක අනිකත් මල්ලක්                        අස්සේ 

රජෙක් වගේ අටමා ගේ ලග                         බැස්සේ

හරියට මෙන්න මෙහෙමයි මෙය                  දාන්නේ 

දැක්කද ඔයා මෙහෙමයි මෙය                    වහන්නේ 

දෝණි ඔන්න ප්ලග් එක නැ                    ගලවන්නේ

එහෙම කරොත් අපරාදේ                       කැඩෙන්නේ

ඔයා එනකං ඇහැරගන ඉන්නේ වෙන මොකටද

මේ ඉන්නේ චමෝදී බබා, එයාට නම් හෙන ගොඩාක් තියනවා , චම්මා, අත්තී, චම්මිණිබෝලේ , දද්දී, අම්මෝ තව ගොඩක් තියනවා, මෙයා ඉස්සරනං තාත්තා එක්ක හරි යාළුයි , ඉස්සර අපිදෙන්නා නිතරම උම්මා හුවමාරු මද්ධ්‍යස්ථාන  එහෙම දැම්මා, පස්සේ පස්සේ අපි දෙන්නා ටිකක් ඈත් උනා, මොකද දන්නවද 

තාත්තා මීයෝ , කැරපොත්තෝ රිංගපු , මළකඩ කාපු , විෂබීජ පිරිච්ච මෙෂින් අතගාලානේ ගෙදර එන්නේ (දවසක් එක මැසිමක් අස්සේ සනිපාරක්ෂක තුවායකුත් තිබ්බා, මීයෝ අරගන ගිහින්), ඉතින් මෙයා දුහගන එනවා මගේ ලගට , මම එයාව වඩාගන්නේ නැතුව , 

''මාව අල්ලන්න එපා මගේ ඇගේ ජරාව , මම ඇග හෝදගන එන්නං කියලා''

කියලා එයාව පැත්තකට කරනවා. ටික දවසක් යනකොට මෙයා මාලගට එන එක ටික ටික අඩු උනා

දැන් එනවා මෙයා මම බයික් එක නතර කරනකොටම

''තාත්තී ඔයා මොනවද මට ගෙනාවේ''

මම ඉතින් ගෙනාපුදේ දෙනවා මේකී මාව බල්ලට දාලා අර ගෙනාපුදේ කනවා , මා දිහාවත් නොබලා,

තාත්තා උනත් මමත් මනුස්සයෙක්නේ දෙයියනේ , අටමගේ හිත හොදටම රිදෙනවා.

දැන් ඇහැරවලා ඇහුවත් කාටද ආදරේ කියලා ඉස්සෙල්ලම අම්මට කියලා , ඊ ලගට නංගිට කියලා , තව රටේ ලෝකේ දහයකගේ නං කියලා කියනවා ඊලගට ආදරේ තාත්තිට කියලා, 

(එතකොට තමා ඉතින් අටමට හිතෙන්නේ උස්සලා විසිකරන්ඩ වෙලට)

පස්සේ මම දෙන්නං උඹට කියලා හිතලා දවසක් කෙල්ල බයිට් එකට ගත්තා

''තාත්තී මට මොනවද ගෙනාවේ''

ගෙනාපු දෙළුම් ගෙඩිය හංගාගන මම කියුවා

''අයියෝ මට අමතක උනා''

බෙල්ල නමලා කට ඇද කරපු මේකි කියපි

''අමතක උනා, ඇයි ඔයා දන්නැද්ද මම ඔයා එනකං ඇහැරගන ඉන්නේ ඔයා ගේන එක කාලම දොයියන්ඩ කියලා''

''අනික මට අද සල්ලි හම්බුනෙත් නැ''

ඉනට අත්දෙක තියාගන මේකි, මට දුන්නා රෙදි ගැලවෙන්ඩ

''සල්ලි හම්බුන් නැ කියන්නේ , ඇයි අද උදේ ඉදන් මැෂින් හදන්ඩ යනවා කියලා කොහෙද ගියේ''