2018-11-20

සම්සුදීන් නානා



ඔන්න මම දන්න පොරක්  හිටියා අපි මෙයාට නානා කියමුකෝ ලියාගන යන්ඩ ලේසියට , බුවා ඇවිල්ලා ආතල්  ඩයල් එක , නිතරම හිනාවෙන් විහිලුවෙන් තමයි කාලය ගතකලේ  , වැඩි කලබලයක් නැ ආවහම පැයක් හමාරක් කයියක් ගහගන ඉදලා තමයි  යන්නේ  , එහෙම ඉන්නෙත්  නිකම්ම නෙමෙයි ..ඒකත්  පොර කරගන ගිය බිස්නස් එකේම එක අංගයක්.

මෑන්  රස්සාව විදිහට කලේ  ටිකක් අමුතු  වැඩක් , පොර හැමෝටම කියුවේ  ඉන්දියාවෙන් චීනයෙන් බඩු ගෙන්වනවා  කියලා  , ඒත් පොර ගෙන්නන දෙයක් නැ පිටරටින් .... මැන්  කලේ  ඔය මහන මෙෂින් , මහනමෙෂින් අමතර කොටස් , මැහුම් උපකරන , උපාංග , මැහුම් අමුද්‍රව්‍ය වෙලදාම තමයි  ... ඒකත්  මූලික වශයෙන් මෙහෙමයි  .......... ඔන්න පොරක්  කියනවා ....

‘‘ නානා මට ඉන්දියන් ඕලොක් දහයක් ඕන ‘‘

‘‘හරි දෙන්නා බොසා බෙස්ට්ම ප්‍රයිස් එකක් , මාකට් ප්‍රයිස් එකට වඩා ටූ හන්ඩ්‍රඩ් රුපීස් අඩුවෙං දෙන්න , ටුවෙන්ටි ෆයිව් පීසස්  දාමු ‘‘

‘‘ පිස්සුද නානා  එච්චර බෑ ... දහයක් ඇති ‘‘

‘‘ හරි  වැඩේ  කරමුකෝ  එහෙනං  කෑෂ් ‘‘

‘‘ අවුලක් නැ  කාටවත් දුන්නේ  නැ මේ ප්‍රයිස් එක , කෑලි විසිපහට අඩුවෙං ... කෑෂ් වලට කරමු  ..ඒ ගාන දෙන්නං ‘‘

‘‘ කෑෂ්  නැ නානා... එහෙම කරන්ඩ එපා  ..චෙක් එකක්  දෙන්නං  තර්ටිඩේස් ‘‘

‘‘ හරි හරි  බොසා  ... ඔයා මගේ  රෙගියුලර් කස්ටමර් නේ .... පාටි චෙක්නං බෑ ‘‘

ඔහොම  කියන පොර   බඩු තියන තැනකට එනවා  , එතන බුවාට  ටෝක් කරනවා ..මාසතුනකින්  සල්ලි දෙන්ඩ ... එව්වත්  පාටි  චෙක්  ....මෙෂින් අයිතිකාරයව කැමති කරගන  නාට්ටාමි කෙනෙක්  අඩගහගන ඇවිත්  පොරට කියනවා  ... අහවල් තැනට කෑලි  දහය බාලා  බඩු  ගෙනත් දුන්න  ගාස්තුව ගන්ඩ කියලා.

ඒක කෑල්ලකින්  හත් අට සීයක්  අතේ  ,  සල්ලි දෙන්නෙත්  නැ  , චෙක් ලියන්නෙත්  නැ , අඩුම තරමේ  පෙට්ටියක් අතින් අල්ලන්නෙත් නැ

ඔය ඇවිල්ලා   එක  ක්‍රමයක් .... අනිත්  ප්‍රධාන ක්‍රමය  තමයි බඩු  හැංගිල්ල

ඒක කරන්නේ  මෙහෙමයි

ඔන්න  හිතන්නකෝ  දැන්  කවුරුහරි  කෙනෙක්  මොනවහරි ගේනවා  ......... හම් හම්ම්ම් ... අපි  හිතමුකෝ  ... මහන මෙෂින්  මෝටර්  ....  බූවා  ට ඔව්වයෙත්  ආරංචි  යනවා   සංගාලා ......... ඩීටේල්  තියනවා  ...... ඒවාගේ  ඒවා තව කවුද ලංකාවට දැම්මේ  , කොච්චරක්ද  ............ කලින්  පාර යාපනේ  ගියේ  කොච්චරක්ද  , ගාල්ලට කොච්චරද  .............. අන්න ඒ වාගේ .......... එවා ඔක්කොම  ....ගලපලා ගත්තහම බුවා දන්නවා  .......... කොයි කාලෙද  ........ කොච්චරක්ද ලංකාවට හිග වෙන්නේ  , කාටද ඕන වෙන්නේ  ..... උන් ගන්නේ  කොච්චරක්ද.

අයියා  සේ  බහිනවා සීන්  එකට............ගෙන්නපු  එකාවත්  කොර වෙන කොන්ටිටියක්  ඉල්ලනවා ........ මෙන්න  මෙහෙම

‘‘ බොසා  ... රිවස්  මෝටර්  ආවා නේ ( ඩොමැස්ටික්  ඔවර්ලොක් මෝටර් ) කලින්  කොලිටියමයි  නේ  ..... බැකට්  එක දුස්පා කොලිටි නෙමෙයිනේ ‘‘

‘‘ නැ නැ  ... මේපාර  බඩු  වලට එකකට ඩොලර්  එකක්  වැඩිපුරත්  ගෙව්වා....  බලන්ඩකෝ  ඔයා අතට අරං  සුපර්  ... කොපර්  කොයිල් ‘‘

‘‘ පිස්සුද බොසා   කොපර්  මේ ගානට දෙන්ඩ   බෑ ... මේ කොපර්  ප්ලේටර්ඩ් කොයිල් ‘‘

‘‘ කොහොමහරි   බරත්  වැඩියි  ...... ගෑම්  එකසිය  හැත්තැවක්  විතර ... ඔයා බලන්ඩකෝ  ඉස්සෙල්ලම ‘‘

‘‘ හරි හරි  බොසා  ....... බොසාගේ  බඩු  මම දන්නවනේ  ... පෙට්ටි පනහක්  දෙන්නඩ ‘‘

යකෝ  දාල තියෙන්නෙත් මෝටර්  දාහයි  ... මූ පන්සීයක්  ඉල්ලනවා.............. අයිතිකාරයත්   ඇදලා ඇදලා දෙනවා , බුවත්  ඇදලා ඇදලා  ලග තියන  පාටි චෙක්  ටිකක් දාලා ඉතුරුවට  ..පුලවන් තරං  ඇදලා .. පලුවන්තරං කඩලා   චෙක්   දෙනවා , හැබැයි  බඩු  ටික විකුනන්නේ  නැ ... ගෙදර තියන  ඉස්ටෝරුවට   දාලා  ........ සද්දේ  වහලා ඉන්නවා .......

ඊටපස්සේ අර කලින්  කියුවා  වාගේ  ආපුවහම  බයිලා ගගහ ඉදලා  .... හිමිහිට  ... ඔය සෙල්ස් ගර්ල් කෙනෙකුට වෙරලු අච්චාරු මල්ලක් , බොම්බේ  සුවිට්  කෑල්ලක් මිට මොලවලා ... ඉතුරු මෝටර්  ගියේ කාටද ... තව කොච්චර  ඉතුරු වෙලා තියනවද  කියලැ දැනගන්නවා.

ඔහොම  ගිහින් ගිහින් සමහර වෙලාවට ලංකාවට බඩු ගෙන්නපු  එකත්  බඩු  නැති  උනහම  වැඩිගානට  නානගෙන්  බඩු  ගන්නවා , බූවා  කොහොමහරි  නාහෙන් අඩලා  වෙන කෙනෙකුගෙං  ඉල්ලගන්නේ  කියලා  ... කෑෂ්  වලටම   වැඩේ  කරනවා  ... එක මෝටර්  එකකට  දෙතුන් සීයකට  කට්ටයකුත්  තියලා  .... පොර බඩු ගෙනියනකොට  දුන්න  චෙක් දෙකක් තුනක්   බැංකුවට දාන්ඩත් තියනවා ඒ වෙනකොට. කොහොමද  බුවාගේ  මොලේ.

ඔය  ගෙන්වන කෙනා  තොගයට බඩු  දෙනකොට  ගැරන්ටියක්  වොරන්ටියක්  නැ  , එතනින්  ඇරගන සිල්ලරට විකුනන කෙනා  හරි  ඔය නනාවගේ  අයගෙන්  ගන්න තුන්වෙනි හරි  හතරවෙනි කෙනාට තමයි  ඒ වගකීමට කරගහන්ඩ වෙන්නේ.

හැබැයි  නානා  එහෙම  නැ  , බඩු ගැන  කම්ප්ලේන්  ආවහම  ... අයියා වාගේ

හරි හරි  ගේන්ඩ බොසා කියල  මැසිම ගෙන්න ගන්නවා ...  දුර මුදලාළිලානේ  .... දහසක් වැඩ එක්ක කොලඹ එන්නේ  ... උදෙන්ම  නානට  ගෙනත්  දානවා  ... නානා  නාටිමිකෙනෙක්  අතේ  අපේ ලගට එවනවා....  මුදලාළිට කියනවා  ... මගේ  ටෙක්නීෂියන්  එන්නේ  දවල් වෙලා ඔයා  පර්චසින් කරලා  ... යන ගමං හවස් අතේ  එන්ඩ කියලා

ඔන්න  ඉතින්  දහයට එකොලහට ඇවිත්  අපිට වද දෙනවා  , පකිස්තාන් බුලත්  විට පංපරා ..... අනං මනං පැකට්  කකා  කෙල ගිල ගිල අපිට වද දෙනවා  , ( එව්වා කාලම තමයි බුවා මලේ ) ... අපිත්  පුලුවන්  තරං කර අරින්ඩ හදනවා ... බොසා කැමතිත්  නැ  ඒවා හදන්ඩ .... මොකද  අපි සිල්ලරට විකුනනවට වඩා පන්හය දාහක්  අඩුවට  එව්වා දෙන්නේ  වොරන්ටි නැතුව .... බොසත්  පැත්තකට වෙනවා  .... පස්සේ  ගැලවෙන්ඩම බැරි  උනහම  අපිත්  අටවලා දෙනවා  ....

සමහර වෙලාවට  පාට්ස්  මාරුකරන්න  වෙනවා  .... මැන් කොහොමහරි  වද දිලා දීලා  ලොක්කගෙන්   ඒ ටික නිකං ගන්නවා ......... එහෙමත්  බැරුව  ගියහම  .... පොඩි සද්දයක්  දානවා  .......... හරි ගියේ  නැත්තං  අල්ලනවා   ලොකුම  ලයින්  එක  ............ සුද්දා වාගේ  පාට්ස් වලට සල්ලි දෙනවා  ......... සමහර වෙලාවට  සල්ලි  වලටවත්  ගන්න මාකට්  එකේ   උවමනා  අමතරකොටස   නෑ .............. නානා  ඒත්  වැඩේ  අත අරින්නේ  නැ .......... එතකොට  තමයි  නියම සංදර්ශනේ  තියෙන්නේ

නංගි  බිල් කරන්ඩ මට මෙෂින්  එකක්

කියන බුවා  සල්ලි දීලා  අලුත්  මෙෂින්  එකක්  ගන්නවා  , ඇරගන  අපිට දෙනවා කෑල්ල ගලවාගන්ඩ කියලා ... ඒකරලා යනකොට   ...ඒ මෙෂින් එකත්  ඇරං  යනවා  ... ඒකරලා  අර කෑල්ල මාකට් එකට බැස්සහම  අපිට කියලා හරි වෙන තැනකට කියලා හරි  හයිකරගන  .... විකුනනවා.

ඔන්න  දවසක්   උදේ  පාන්දර  බුවා එනවා ක්ලොත්  කටර්  හතරක්  ඇරං , අපෙන්ම ගත්තුවා

ඒ  කාලේ  එකක්  12500ක් විතර වෙනවා , බුවාට  අපේ බොසා දෙන්නේ  8500ට විතර

මචං  මල්ලි  මට මෙව්වා පාට්ස්  කරලා  දෙන්ඩ .... ආයේ  ඉතින්  හදන්ඩ වෙලා ගියාට ගලවන්ඩ  වෙලා යන එකක්ද ... ඇලන්කී ටිකයි ප්ලැට් එකයි  මල් එකයි  ලොක් අඩුවයි ගත්තහම කටර් හතරටම විනාඩි  විස්සයි.

ගලවලා දෙන කෑලි  ටික ඔක්කොම  මල්ලකට දාගන කයිය ගගහ ඉදලා සතපහක් නොදී  මාරුවෙලා යනවා  .......... අපිට  නැති වෙලා  කටින්ග් මෙෂින් පාට්ස්  උගෙන්  ඇහුවහම

ෆීල්ඩ් කොයිල්  එකක් 3000යි
ආමිචර් එකක් 3000යි
බ්ලේඩ්  එකක් 900යි
වීල් එකක් 2500යි
හැඩල් එකක් 2250යි
හවුසින් එකක් 3500යි
වයර් එකක් 750යි
බ්ලේඩ් ගයිඩ් එකක් 650යි
ගයිඩ් ස්ප්‍රීන්ග් එකක්  350යි
බ්ලේඩ් නට් එකක් 300යි
ස්විච් එකක් 450යි
බ්‍රෂ් ජෝඩුවක් 300යි
බ්‍රෂ් කප් ජෝඩුවක් 200යි
බේස්  එකක් 2000යි
බේස් වීල් සෙට් එකක්  650යි
බේස් බැකට්  එකක් 2300යි

ඇණයකුත්  රුපියල්  80 ක්  යකෝ

කොහොමහරි  මස්කරන කටර්  එකත්  ඌ විකුනනවා  20000ත් පන්නලා

ඔහොම  ගේම ගහගන ගියාට  ගුරුන්ටත්  අකුරු වරදින දවසක්  තියනවනේ  , මේ  කතාව  මට කියුවේ  බුවාගේම රස්සාව කරපු  ... බුවාලගේම  රැහේ පොරක්  .... පොරව කාලයක්  ටිකක්  හිරවෙලා තිබුනා  ... ලොකු ලීගල්  කේස් එකක්  වෙලා  ... ඒ  කාරනාව නිසාම මිනිහගේ  ගනුදෙනු  පොඩ්ඩක්  අබ්ලික්  වෙලා  ලෙල්ලටම හාන්චිපයිස් වෙලා හිටියා සෑහෙන දවසක්  ......... ෆිල්ඩ්  එකේ  බුවාල  කතන්දරේ  දන්න හන්දා  මෑන්ට ..චාන්ස්  එකක් දීලා  නිදහසේ  බජාර් එකේ මූවෙලා ...ගොඩ යන්ඩ දුන්නට  ........... අපේ නානාගෙං  නෝ චාන්ස්ලු........ යන යන තැන දකින දකින තැන මස් රාත්තලම ඉල්ලනවලු ........... පස්සේ  බුවා  මග අරින්ඩ ගත්තලු  නානාව..... අපි කතාව කියන්  යන්ඩ  මෑන්ට ඉර්ෆාන්  කියල නම දාමුකෝ.

දවසක්  ඉර්ෆාන්  උදේ  දහයට එකොලහට  ගෙදර ඉන්නකොට   බජාර්  එකේ ටකල් කරන්ඩ බැරි වෙච්ච හන්දා  නානා  එනවලු  ගෙවල්  පැත්තට , ගේට්ටුව ගාව ඉදන්  ගහන හොන් පාරට ජලෙන්  ඔලුව දාල නනා බව දැනගත්ත ඉර්ෆාන් ....   පවුලට....   මොනවහරි  කියලා නානව පිටත් කරන්ඩ කියලා  ගේ  අස්සේ  හැංගුනාලු.....  අර ගෑනු  මනුස්සයා  ... දොරකඩට  එනකොටත්  .... නානා බැහැලා ඇවිත් ගේට්ටුව ඇරලා  වෑන් එකට නගිනවාලු ... වෑන් එක නවත්තලා මිදුල මැද්දේ  ....... හිනාවක් දාගන නැගං ඇවිත්  වාගේ  ඉස්තෝප්පුවේ  පුටුවකින්  ඉදගන එහෙම

කෝ ඉර්ෆාන්ට කතා කරන්ඩ

එයා ගෙදර නැනේ  අයියේ

බසාර් එකේ  දැක්කෙත් නැ   මොකද බලන්ඩ ආවේ

බිස්නසුත්  නෑ අයියේ ... ඔය එලියට බැහැලා යනවා  .... පාරවල් දිගේ  ඇවිදලා ගෙදර එනවා .... යන්නේ  කොහෙද කියුවෙත්  නැ  ....ඔය ලගකට යන්ඩ ඇත්තේ

මට හදිස්සියක්  නැ  ... එනකං ඉදලා  හම්බෙලාම යනවා

ඔහොම කියුව  නානා  ... ළමයි එක්ක  කයිය  ගගහ  .... දොර ගාවට පුටුව  ඇදං  ටීවි  බලාගන  ......  සැරින් සැරේ  කතා කරලා  ගෑණු  මනුස්සයව  එලියට ගෙන්නගන කයිය  ගගහ ඉන්නවලු  යන පාටකුත්  නෑලු , දවල් බත මතක්කරලවත්  එලියට අරින්ඩ හිතපු  ගෙදර මනුස්සයා ..

අයියට දවල්ට  කන්ඩ දෙන්ඩ විදිහක්වත් නැ  ... මේ ළමයින්ටත්  හරියට කෑමක් නැ

ආ  මං කෑම එකක්  ඇරං ආවේ  ... ඔය වතුරඑකක් දුන්නා නං  කියල  ......... වෑන්  එකට ගිහින්  ........ ලන්ච් බොක්ස්  එකක්  ඇරං ඇවිත්  .......... අර මනුස්සයා  ගෙනත්  දුන්න  වතුර වීදුරුව  පැත්තක තියලා  අත හෝදන්ඩත්  වතුර භාජනයකුත්  ඉල්ලා ගත්තලු

බත්  එකත් කාලා  ... වතුර එකත් බලා .... කලින්  අත හෝදන්ඩ දුන්න වතුර භාජනයටම  අතත්  හොදගන  වටේට  කොල්  කර කර  නේනවලු  මේකා  යන පාටක්  නැලු

පස්සේ  මේකා යන්නෙම  නැති ..බැරිම තැන ඉර්ෆාන්  ගේ  පිටිපස්සේ  තාප්පෙං පැනලා  ... තව වත්තකිනුත්  පැනලා  බඩ ගින්නේම   ටිකක්  අහලපහල  නෑදෑ  ගෙදරකට  ගියාලු

හවස්  උනාලු  කරුවලත්  වැටුනලු  ... නානා යන පාටක්  නෑලු ... හත හත හමාර වාගේ  වෙනකොට  ...ගෙදර ගෑණු  මනුස්සයා කියුවලු

අයියේ  හවස්වෙනකොට  අපි  ඉස්සරහ  දොර වහනවා  ...මේ ළමා ළපටි  මදුරුවෝ  කන නිසා  ......... කියලා

හරි හරි  නංගි  දොරවහගන්ඩ   මට ඉර්ෆාන්  හම්බෙලාම යන්ඩ උවමනාවක්   තියනවා  ... කීයටහරි  මිනිහා  හම්බෙලාම තමයි  යන්නේ  ... මටත්  දැං ඉදගනම   ඉදලා අමාරුයි  ... ඔය පැදුරක්  වගේ  එකක් තියනං  දෙන්ඩ මෙතනින්  දාලා පොඩ්ඩක්  හාන්සිවෙන්ඩ කියලා

ඉර්ෆාන්ගේ  පවුලත්  දැන්  පැදුරක්  නොදී දොරත් වහගන කල්මරනවලු

ටිකකින්  නානා  දොරටතට්ටු  කරලා අහනවලු  පැදුරක් නැද්ද කියලා , පසසේ  පරණ පැදුරක්  බුවාට දීලා  ....  අර ඉර්ෆාන්  ගිය ගෙදරට  කෝල්  එකක් ඇරං  ඉර්ෆාන්ට විස්තරේ  කියුවලු ..... මේකා යන්නේ  නැ  ... පැදුරකුත්  ඉල්ලා ගත්තා කියලා

අනේ  ඉතින්  ඊට  පස්සේ  ඉර්ෆාන්  අහල පහල  දන්න  දන්න හැමතැනටම ගිහින්  දාහ පන්සීය  එකතු  කරගන පොඩි ගාණක්  හදාගන  ගේට්ටුව ඇරගන  ඉස්තෝප්පුවට ගොඩවෙනකොට .... නානා ගොරව ගොරව  බුදිලු .............  පස්සේ  ඉතින්  නොවදිනා වැදුං   වැදලා  ... හම්බුන  සොච්චම දීලා .... ඉක්මනටම සල්ලි ටික ඔක්කොම  දෙන්නං පරක්කු  උනාට සමාවෙන්න කියුවලු.

සල්ලි  බලාගන  ආපු  ගමනක්  නෙමෙයි ... මේ  ලගකට ආපු ගමන්  ... ගොඩදවසකින්  දැක්කේ  නැති නිසා  ඉර්ෆාන්ගේ  මූණ බලලා යන්ඩ ආවේ  කියල  සම්සුදීන් නානා යන්න ගියාලු.


2018-11-01

මෙන්න බලන්න මේ siruba 747 overlock එකට වෙලා තියන දේ
















මේ  මෙෂින්  එක  සිරුබා නුල් හතරේ  ඔවර් ලොක්  මෙෂින්  එකක් , මේ   මෙෂින්  එක අවුරුදු 15 විතර  අලුත්වැඩියා කරන්නෙකුට පෙන්වන්ඩ උවමනා වෙලා  නැ  ,  ඒක හරිම  වාසනාවක්  ඒතරම් කාලයක්  කිසිම අලුත්වැඩියාවක්  නොකර දුහන්ඩ ලැබුන එක , ඒකට හේතුවකුත්  තියනවා  ..ඒ  නෝනා  වසර විස්සක්  විතර ඇගලුම් කර්මාන්ත ශාලාවක මහන යන්ත්‍ර වල වැඩකරපු  කෙනෙක්  ... ඉතින් පොඩි පොඩි ලෙඩ වලට දෙන්න ඕන බෙහෙත්  එයා දන්නවා .. මේක  එයා  ගෙදර පාවිච්චියට ගත්ත එකක් , දැනට වසරකට විතර කලින් එකපාරටම හිරවෙලා  පැත්තකට කරපු  පාර අල්ලලාවත්  නැ ..එහෙම පැත්තකට කරලා   තියෙන්නේ  ... ..  මහ මහ ඉන්නකොට  එක පාරටම හිරවෙලා. ඒ දැම්ත්  හරි ඒ පැත්ත බලලාවත්  නැ ...


ඊයේ පෙරෙයිදා  දවසක බොක්කේ  පිට් කස්ටමර්  කෙනෙක්  කතා කරලා  කියනවා
අයියේ  නුල් හතරක්  තියනවා  දාපු ගමං බෙල්ට්  එක කඩලා ගියා
ඔයාගෙද

නැ අපේ  නැන්දෙකුගේ

කියනකොටම කුන්ඩවාලියක් කියලා දැනුනත් මම අර මනුස්සයට බෑ කියන්ඩ බැරිකමට  ගියා , කෑළි ගලවලා  සුද්ද කරලා , ආයේ  හයිකරලා  සෙට්  කරන්ඩ  පැය 7 කට වඩා  ගියා  ............ මෙෂින්  එක හදන්න හදන්න මම අයකලේ 1800ක්  විතරයි  ... හැබැයි  මෙෂින්  එකේ  අයිතිකාර නෝනට  ... WD 40 , ලාම්පුතෙල් , ගෑස්කට් සීල් , ඔයිල් ..සහ අමතරකොටස්  වලට  සහ මගේ  ගාස්තුව එක්ක රුපියල් 7000 කට ආසන්න  ගානක්  වියදං කරන්න  උනා.

මේ  අමාරු  කාලේ  ඒක  ලොකු  ගානක්  කියලයි මටනං හිතෙන්නේ  ......

එහෙම නොවී  ඒ නෝනට තියන දැනුමත්  එක්ක ලස්සනට  පාවිච්චි කරන්න තිබුනා මෙෂින්  එක


ඔයාලට හිතෙන්නේ  ඒ  නෝනා දන්න කෙනෙක්  වෙලත්  අතපසු  උනේ  මොකක්ද.

එයා  අතපසු  කරගත්තේ  නියම  කාලයේදී ඔයිල්  මාරුකරන එක 

එයා  දිගින්  දිගට කලේ  මොකක්ද...  ඔයිල්  ලෙවල් එක  බහිනකොට  ... අඩුවෙන ප්‍රමානය මෙෂින්  එකට දැම්මා ...

එයා කියන විදිහට පිට කොටුවේ  ලාබ නිසා  ලිටර් හතරේ  කෑන්  එකක්  ගෙනත්  තියාගන  දිගටම  දැම්මලු  අඩුවෙනකොට ...

ඔය පින්තුරවල  පේනවා  මෙෂින්  එක අඩියේ  මිලිමිටර්  අටක්  දහයක්  විතර  ඔයිල් කායං බැදිලා   තියනවා ....

ඔහොම  බැදෙනවා  එහෙට්ට මෙහෙට්ට යන  වටේට කැරකෙන පාට්ස්වලත්  ...  මෝටර්  එකත්  හරිම අමාරුවෙං  හිර මෙෂින්  එකක්  ඇදගන  දුහලා  අබලං වෙලා...

ටිකක්  හිතන්න  

ඔයිල්  ටික ටික  එකතු  කරන්න එපා , තියන ඔයිල්  අයින්කරලා  , ෆිල්ටර් තියන මෙෂින්  එකක් නං ඒකත්  සුද්ද කරලා  .... එහෙම බැරිනං ..   ෆිල්ටර්  එක සවුත්තු  වෙලානං  ඒක මාරු  කරලා  ... මෙෂින්  එක සුද්ද කරලා  ... නිෂ්පාදකයා  ... අනුමත කරන ඔයිල්  වර්ගයෙන්  ... අනුමත කරන ප්‍රමාණය යොදන්න 

යකඩ ගොඩවල් වලට ආදරය කරන කෙනෙක්  විදිහට මට මෙහෙම එව්වා දැක්කහම හරි දුකයි

( මේකත් හරි  දුකයි  ... අනවශ්‍ය සැප දෙන්ඩත්  එපා  ... මෙෂින්  තියෙන්නේ  අපේ  වැඩ පහසුකරගන්ඩ ... ඕනවට වැඩිය සැප දෙන්ඩ ඕනත්  නැ ... අවශ්‍ය දේවල්  විතරක්  කරන්න )


තව මොනවහරි  දැනගන්න  ඕන නං  කතා කරන්න .0778707807

2018-10-16

එහෙම එකක් උනාද අප්පා





ශ්‍රී සංඝමිත්තා මහා විද්‍යලය කියල ඉස්කෝලයක්  තියනවා  නැලිගම ..ඒ කියන්නේ  රාගමයි කඩවතයි අතරේ .... මං ඉස්කෝල තුනකට ගිහින්  අන්තිමට ඔය ඉස්කෝලෙන් තමයි ඕලෙවල් කෙරුවේ , ..  ඔය ඉස්කෝලෙන්  සිස්සත්තේ පාස්වෙලා ,  ඕලෙවල් පාස් වෙලා  ගිහින් වෙන ඉස්කෝල වලින් ඒලෙවල් කරලා , ගොඩ ගිය ඈයෝ  ඉන්නවා  බරට ..... හැම වසරකම එහෙම පිරිසක්  බිහිවෙනවා  ............ හැබැයි ඒ කවුරුත්  ඔය ඉස්කෝලේට ගියා කියල නං කියන්නේ  නැ.

ඉතින්  ඔය ඉස්කෝලේ ඉන්න කාලේ  දවසක්  මට නිතර වෙනවා වාගේ ( අදටත් එහෙමයි ) නොකරපු  වරදකට ගුටි කන්ඩ උනා  .................... අපේ  හිටියා සෝරත කියල හාමුදුරු නමක්  , බොහොම ලස්සන ප්‍රීයමනාප හාමුදුරු නමක්  , ටිකක් වෙනස් විදිහේ  කෙනෙක්  ........... එයා  ගාව තිබුනා  ලොකු  ඇල්බම් එකක් වාගේ  පොතක්  ........ එකේ  තිබුනේ  ලංකාවේ සහ  පිටරටවල් වල මුදල්  නෝට්ටු ....... අපිට ඉතින් ඔව්වත් ගෙනත් පෙන්වනවා ........... සැර පරුෂ කෙනෙකුත් නෙමෙයි  ....... ඒ උනත් අපි  එයාට බයයි  ..... බයක් කියන්නේ  නිකං   ගෛෟරවයක්  වාගේ  දෙයක්  , අනික අනිත් ගුරුවරු වගේ  අපේ  වැඩවලට  එහෙමට ඇගිලි  ගැහුවෙත් නැ  ,  කෙල්ලෙක්  කොල්ලෙක්  පාරේ  කතා කරකර හිටියත්  ......... උන්  දෙන්නා ලව් කියල දන්නවා උනත්  නොදැක්කා වාගේ  යනවා. සිංහල , සාහිත්‍ය , බුද්ධ ධර්මය වාගේ  විෂයන්  තමයි ඉගැන්නුවේ. සමහරක්  වෙලාවකට තරමක්  සයිස්  කෝටුවක්  , පොල්ලක් , වේවැලක් එහෙමත් ඇරං එනවා  ......... ඒත් කාටවත් ගහපු දවසක් නං මතකයේ නැ. ඇත්තටම මගේ  හිතේ  ලොකු  ගෛෟරවයක්  ආදරයක්  ඒ හාමුදුරුවන්ට තිබුනා.

ඔන්න එක දවසක්  හාමුදුරුවෝ  පන්තියට එන්න පරක්කු උනා  ... මයේ හිතේ  දානේ වෙලාව සෙට් උනාද  කොහෙද , සමහර කෙල්ලෝ  පාඩං කරනවා  , තවත් එවුං ටිකක්  ඕපා දුප කියවනවා , කොල්ලෝ  ටිකක්  පෑන්  ගහනවා  , තව එවුන් ටිකක්  කයිය ගහනවා  .........  මම ඉදගන හිටපු තැනින්  නැගිටලා පන්තිය ඉස්සරහට ගියා මොකකට හරි ....

‘‘ ඔය හුනු කොට්ටේ  දාපං ‘‘

තුෂාර මට කියුවා , මමත් ඉතින්  මාස ගානකින් ගසලාවත් නැති හුනු කොට්ටය ඌට පාස් කරන ගමන්  පන්තිය මැද්දෙං ඇවිදගන ආවා , මගේ  වම් අත පැත්තේ  ඒ කියන්නේ  කෙල්ලෝ  ඉදගන ඉන්න පැත්තේ  අයිනකට වෙන්ඩ ඉදගන හිටපු  සුජාතා මම හුනු කොට්ටය ගන්නවා දැක්කා .... මගෙම කරුමෙට ඒකිව පාස්  වෙනවත් එක්කම තුෂාරයා හුනු කොට්ටෙං ඒකිට  කෙලලා ඇරියා ........ අපේ  උන්දැ වාගේ  කළු කෙල්ල .......... වම් පැත්තේ  ඇහැත්  එක්ක මුලු මූනම සුදු වෙලායන්ඩ හුනු කොට්ට පාර  වැදුනා ............ එක අතකින් ඇහැ වහගත්ත කෙල්ල අනිත් ඇහෙං  මාදිහා බැලුවා.  මම ඉදගන හිටපු  තැනින්  ඉදගන්ඩ හදනවත්  එක්කම සෝරත හාමුදුරුවොත්  පන්තියට ආවා.

ආපු ගමං සුජාතා  හාමුදුරුවන්ට  සිද්ධවෙච්ච අවනඩුව කියුවා ........ නොකියුවත්  යමක්  සිද්ධ උන බව ...පැහැදිලිව නොදැක්කා උනත්  හාමුදුරුවෝ   දැක්කා.  අනික කේස්  එක බරපතලයි  කෙල්ලගේ  ඇහැට හුනු ගිහින්  , ඒ  මදිවට ඒ  බර කොට්ට  වැදුන පාර ඇහැත්  ඉදිමිලා .... ,       ඒත්  එක්කම තුෂාරයා

‘‘ මචං  මාව මාට්ටු  කරන්ඩ නං එපා ‘‘

කියුවා  ............ දැං මොකද කරන්නේ.

‘‘ මංජුල  මෙහේ එනවා , මොකද මේ ළමයට හුනු කොට්ටෙන්  ගැහුවේ ‘‘

‘‘ මම ගැහුවේ නැ  හාමුදුරුවනේ ‘‘

‘‘ මෙයා  ඉස්සරහට ඇවිත්  හුනුකොට්ටය  ගන්නවා  මම දැක්කා ‘‘

‘‘ මම ඒක  ගත්තා  ඒත්  මෙයාට ගැහුවේ නැ  හාමුදුරුවනේ ‘‘

‘‘ ගත්තලු ගැහුවේ නැලු  .... දික්කරනවා අත ‘‘

යකෝ  කවදාවත් මේ සයිස්  පොල්ලක් ඇරං එනවා මම දැකලම නැ  ....... ඒකත්  මගේ  කරුමෙටම සෙට් උන හැටි .... අනික මම වරදක් නොකර මොකටද  ගුටි කන්නේ  .......

‘‘ මම නොකරපු දේකට මට ගුටිකන්ඩ බෑ , අත දික්කරන්නේ නැ ‘‘

ඒ කතාවට  හාමුදුරුවන්ට  අසුහාරදාහට කේන්ති ගියා .......... අනික  පන්තියේ  ඉන්න  අහිංසකම කෙල්ලක් ......... ඇහැට වෙලා තියන හරිය දැක්කහම ඉස්පිරිතාලේ  යන්ඩ වෙයිද දන්නෙත් නැ

දැං හාමුදුරුවෝ  අහු උන අහු උන අතට දිගට හරහට මට නෙලනවා.... රිදෙනවට නෙමෙයි දුකට තරහට මට ඇඩෙනවා   වැඩියක්ම  මං ආදරේ  මනුස්සයා  මට නොකරපු වරදකට ගහන්නේ ......  ඒක දැක්ක හාමුදුරුවෝ  මට ගහන එක නැවැත්තුවා

‘‘ වරදක් නොකෙරුවනං මොකද අඩන්නේ ‘‘

‘‘ මම හුනු කොට්ටෙං  ගහපු  නැති නිසා ‘‘

ටිකක් වෙලා මූන දිහා බලං හිටපු හාමුදුරුවෝ  ගිහිල්ලා  ඉදගත්තා  .... පොල්ල මේසය උඩට විසික් කරන ගමං  ........ පීරියඩ්  එකේ  උගන්වන්ඩ තරං වෙලාවක් ඉතුරු වෙලා තිබුනෙත් නැ  .......... එහෙම්ම බෙල් එක ගහනකං ඉදලා  ...... ආයුබොවං තෙරුවන්සරනයි  නොකියම එදා යන්න ගියා , හාමුදුරුවෝ  ගියාට පස්සේ  එලියේ  ඉදන් මූන හෝදාගන  එන සුජාතට

‘‘ මම නෙමෙයි  බං උඹට ගැහුවේ ‘‘

‘‘ එහෙනං මොකටද ගුටි කෑවේ  , ගහපු කෙනා කියන්ඩ එපෑය ‘‘

.............................................................................................................

අවුරුදු  විසිපහකට විතර පස්සේ  මට සුජාතව මුහුනු පොතෙන්  හම්බුනා ......... මං ඔය කතාව  මතක් කරා ......මේකී  කියපි

‘‘ අනේ  එහෙම එකක්  උනාද........ අප්පා  ....  මට මතක නැනේ

2018-08-22

ඉලන්දාරිකම





හන්දියට ඇවිත් විටක් එහෙම අරං කඩේ අයියත් එක්ක කයියක් ගහගහ හපන්ඩ ගත්තා , එතන තියනවා සැලුන් එකක් , ඔතනට පොඩි එකාව කොන්ඩෙ කපන්ඩ දාල මම දන්න අම්මා කෙනෙක් වෙන වැඩකට ගිහිං , අම්මා එනකොට කොල්ලා ලස්සන කට් එකක් ගහගන එලියට වෙලා ඉන්නවා, අම්ම බකට් එක අදිනවා.


මතීෂ ඔය මොකක්ද ඔය කරගන තියෙන්නෙ ,තාත්ත කියුවේ කොටට කපන්ඩ කියලා නේද


ඉතින් මේ කොටටනේ කපල තියෙන්නෙ




මේ .....ඒ.....දෙන්⁣නේ......හම්... ඉස්සරහිං පස්සෙං ඉතුරුකරලා ... දෙපැත්ත කට් ගහල ...... ආයේ ඇතුලට ගිහිං ඔක්කොම එක ගානට කපාගන එනවා , නැත්තං මං තාත්තට කෝල් කරනවා


ඉතින් තාත්ත කපපු විදිහටනෙ මාත් කැපුවෙ




ආ ඉදපං මම කෝල් කරලා ගෙන්නන් නං




කියුව අරුන්දැ හන්දියෙම රස්සාව කරන තාත්තට කෝල් කරනවා , කඩේ අයියයි මම කතාව අහගන , මං කල්පනා කලේ පච්ච කොටල , කරාබු දාල යකඩ උස්සල ලස්සනට ඇග හදාගන , ඩෙනිම් ගහල , බොඩි ෆිට් ටීෂර්ට් ගහල , ඩෙක් ෂූෂ් ගහල ඉන්න තාත්තයි ,




කොන්ඩෙ පාට කරලා , කොටට ඇදලා , මූනට හැම හත්තිලව්වම කරලා , නියපොතු දහය පාට දහයකිං පාට කරල , කරාබු හත අටක් දාල , වැලමිටයි මැණික් කටුවයි අතර අතේ යට පැත්තෙ වැල් අකුරු වැලක් කොටලා ඉන්න අම්මයි , කොල්ල කට් එකක් ගැහුවයි කියල මොකට නහිනවද කියල.


බලන්ඩ අයියේ කොන්ඩෙ කපාගන තියන හැටි


මරු කට්ටෙකක්නෙ කොල්ල බස්සල තියෙන්නෙ


මරුතමා .... ටිං ටිං වගේ




ඔන්න ආවා එතකොටම තාත්තන්ඩිත්


මතිෂ යනවා ගිහිං නෝට් එකට ගහගන එනවා




ඔයා ගිහිං කියන්ඩකො චන්දනට


කියල කට් ගහගන්නවනං නෝට් එකට කපන්ඩ කියන්ඩ බැරි


පොඩි එකා දොර ඇරගන සැලුන් එකට රිංගුවා


තාත්ත කාරයා මට හිනාවක් දාල


බලපං මචං මූ


පව් බං කොල්ලොනෙ ... ආසයිනෙ ... අනික නිමාඩු කාලෙනෙ


මූ තාම හතර වසරේ බං .... ඉලන්දාරිකම








ලියුවේ  මං

2018-07-25

ඇලෙක්සැන්ඩර් ග්‍රෑහැම්බෙල්




ඔන්න ඉස්සර ටික කාලයක් මං වැඩකරපු ආයතනයක හිටියා පිලිගැනීමේ නිලදාරිනියක් ... පොත්ත රතුවට තිබීම සහ කඩ්ඩ පුලුවන් කම ඇරුනහම වෙන නං පුලුවං අල බෝලයක්  තිබ්බේ නැ .... ලොක්කගේ  නෑදැයෙක් නිසා තමයි රස්සාවට ඇරං තිබුනේ , 



කොච්චර මොට්ට වැඩ කලත් හැමෝම හිනා වෙලා මොකවත් නොකියා හිටියා අහිංසක කමට ඉන්න හන්දා ...... අනිත් එක ඉතින් බයිට් එකට ගන්ඩත් පුලුවන්නේ .... විහිලු කරාට තරහවෙන්නෙ එහෙම නැ ... හරිම අහිංසකයි ....



 කොච්චර දෝදුද කියනවනං ... මීටර් 400 ක් විතර ඈතින් තියන ගෙදර ඉදන් වැඩට එන්නේ ත්‍රීවිලර් එකකට දොරකඩින් අතදාල , හවසට ගෙදර යන්නෙත් එහෙමයි  ....කවුරු හරි ඔය පොඩ්ඩ යන්ඩ ත්‍රීවිල් මොකටද ඇහුවහම දෙන්ඩ මරු  උත්තරයකුත් තිබුනා







‘‘අම්මෝ මේ එන වාහන ගොඩ ..මං කොහොමද පාරෙන් එහා පැත්තට පයින්නේ ‘‘

ඔන්න දවසක් කට්ටිය සිකරට් ගහනවා රූප් ටොප් එකේ ... වෙනත් සහෝදර ආයතනයක දෙන්නෙකුත් ඇවිත් හිටියා ..උන් එකෙකුගේ ෆෝන්  එක ඉල්ලගත්ත සමන්ත ..... ගත්තා අර කෙල්ලගේ  ලෑන්ඩ් ෆෝන් එකට

‘‘ හෙලෝ  මට සමන්තට කතා කරන්න පලුවන්ද ‘‘

‘‘ මිස්ටර් සමන්ත නං මේ වෙලාවේ ෂීට් එකේ නැ සර් ‘‘

‘‘ හරි කමක්  නැ සමන්ත ආපුවහම ග්‍රෑහැම්බෙල්ට කෝල් එකක් දෙන්න කියන්නකෝ ‘‘


‘‘ හොදයි සර්  ...සොරි සර්  .... නම කියන්න ආයේ ‘‘

‘‘ මම ග්‍රෑහැම්බෙල් ... ඇලෙක්සැන්ඩර් ග්‍රෑහැම්බෙල් .... දන්නවා  ඇතිනේ මාව ‘‘


‘‘ සොරි සර් ...අහලා තියනවා මතක නැ‘‘

‘‘ හරි ඒකට කමක්  නැ ..සමන්තට කෝල් එකක් දෙන්න කියන්නකො ආපුවහම ‘‘

කියල මේක ෆෝන් එක තියල කට්ටිය එක්ක බක බක ගාල හිනා වෙලා එහෙම ... ටිකකින්  පල්ලෙහාට බහිනවා ... ඉස්සරහින්ම සමන්තයා  ... මොනහරි වැඩකට ආපු කිහිප දෙනෙක්මත්  තමන්ගේ අවස්ථාව එනකං ඉදගන ඉන්නවා පිලිගැනීමේ නිලදාරිනිය ලග.

‘‘ කොහෙද සමන්ත අයියේ  ඔයා යන්නේ ඇලෙක්සැන්ඩර් ග්‍රෑහැම්බෙල් කියල කෙනෙක් කතා කලා .... එයාට කෝල් එකක් දෙන්ඩ කියුවා ඔයාට‘‘

2018-07-20

දිට්ඨ ධම්ම වේදනීය



                        


ඒ  ඉස්කෝලේ නිවාඩු කාලයක්  .... ලොකු අක්කා ටල්අම්මලැ ගෙදර ඉදන් අපේ ගෙදර ඇවිත් කොහොමත් එයා එන්නේ  එහෙම කාලයට විතරයි  .... ඒ  ආවත්  නිවාඩුව ඉවර වෙනකං ඉන්නෙත් නැ  ඉක්මනට යනවා  ...... පොඩි කාලේ අපි එක්ක හිටියට කොහොමටත් එයා ඉස්කෝලේ යන්ඩ ගත්ත දා ඉන්නම ටල්අම්මලැ ගෙදර තමා .... එහේ  ඉතින්  එයාට ගෙදරට වැඩිය සැලකිලි ... රජ සැලකිලි කියුවොත් හරි ..ආතට ඇරුනහම  ටල් අම්මගේ ( අපෙ අම්මගේ අම්මා )  ඉදන් ඔක්කොටම සත්තම දාගන තමයි හිටියේ .... පවුලේ හැමෝගෙම  දරුවන්ගේ   වැඩිමලා හින්දා  හැමෝගෙන්ම ලැබුන ආදරේ යූස්කලා කියලයි මට හිතෙන්නේ  ........ එහෙම උනත්  ඒකී ඒ කාලෙත්  ප්‍රතිපත්ති ගරුක ඩයල් එක , ආයේ ඉතින්  හරියි කියල හිතෙන දේ  හරිම තමා  ....  ඒ ඒ වෙලාවට සුදුසු  විදිහට ගේම  ගහන්ඩ ඉගන ගත්තා  තනියම .... අපේ ගෙදර හිටියේ  හරිම  අඩුවෙන්  ....... ඒ උනාට චූටි අක්කට වඩා මට දැනෙන්නේ ඒකිව ........ ඒකි ලග තිබුන මනුස්සකං අරකි ලග නැ  ..... ඔය චූටී  අක්කා මං ලියන ඒවා කියවනවා කියල මං දන්නවා  ............ ඉතින් මට පාන්ද ........... ඔව් ඔව් උඹට තමා කියන්නේ  ......අරකිගේ  මයිලක් වටින්නැ  තෝ ............ ඇයි  මම මෙහෙම කියුවා කියල  මං ආවහම .. උඹ මට ලුණු දාල තේ හදලා දෙන්ඩද.

ගහප් බෙල්ල ගැලවෙන්ඩ

උඹ කියන්නේ  චූටි අක්කේ   .... ආ සමහර විට තමුසේ  මේක දන්නව ඇති  ......... ඒ දවස් වල මං ඉස්කොලේ යන්ඩ ටල් අම්මලැ ගෙදර ... තමුසේ  අනුරාධපුරේ  අපේ ගෙදර ... සාවස්තිපුර තිස්සෙට යනවා  ......... තාත්ත වැඩියෙන්  ආදරේ මල්ලිටයි ඔයාටයි  හන්දා  ලග තියාගන  අපිව  රුවන්නැලි  දැක්කුවනේ...  ඒකත්  මරු වැඩේ  කියන්නේ...........   හරිනං එයා අපිව දක්කන්ඩ ඕන  තල්දුවේ  .... එයාගේ  මහ ගෙදර  ... ඒත්  දැක්කුවේ  අම්මගේ  මහගෙදර .............. අපි දෙන්නා  එහේ  ඉතින් .... මාව ඉස්කෝලෙට දාන්ඩ ටල්අම්මා නං  ආව බවක් මතක නැ ............ අනේ ඉතින් සුදුමාම  තමයි  ගොඩක් වෙලාවට ගෙනත් දාන්නේ .. එහෙම නැත්තං චූටි පුංචි ........... එහෙමත් නැත්තං  බටංගල ටෙක් ගියේ නැත්තං චූටී මාමා ....... දවල්ට එක්කං  යන්ඩ  එන්නේ  .. ගොඩක්  වෙලාවට ආතා  .......... ඒ වෙනකොටත්  ආතා  පැන්ෂන්කාරයනේ  ... සමහර දවසට ... ආතා ඉස්කෝලේ ගාව ඉන්නේ සිමෙන්ති බැග්  එකක් ඇරං  .. ඒක අස්සේ  තියනවා  හබරල කොලේ ඔතපු  හරක්මස්  පාර්සලේ

වැඩට ගිහින්  උදේ  ගෙදර එන්ඩ පරක්කු උන දාට නං  ඔන්න කළුමාම  මස්  අරං එනවා ... ඒ එක්ක බටර් පාං ගෙඩියක්  හරි  .... සැන්විච් පාං වගේ  පෙට්ටි  පාං ගෙඩියකුත්  අරං එනවා  ,  ඒක අච්චු  පං එකක්  නෙමෙයි  ............. මට දැං හිතෙන්නේ  ඒක  ඒ කාලේ  සැන්විච්  පාං එක.....

සමහරක් දාට මම ඉස්කෝලේ යන්නේ  ලොකු අක්කත් එක්ක එහෙම දාක මාව ඉස්කෝලෙට දාල ඒකී සෙන්ටල් එකට යන්ඩ හදනකොට මම ඇඩුවා ඇඩිල්ලක් .... පස්සේ  කවුද නැන්ද කෙනෙක් ( රුවන්වැල්ලේ හිටියේ නැන්දල මාමල  , අනුරාධපුරෙත් එහෙමයි  , වතුපිටිවලට , මහරට ආවහම හිටියේ ඇන්ටිල අංකල්ලා ) ... මට රුපියල් දෙකක්ම දුන්නා කියහංකෝ  .... මං ඒකෙන්  පන්තියේ  කෙල්ලන්ට සීනී බෝල ඇරං දුන්නා.

ඔහොම ටික කාලයක් ගිහින්  ආයේ මාව අනුරාධපුරේ දැම්මනේ චූටි අක්කා  එක්ක  තිස්සෙට  යන්ඩ ..එහෙනුත් ඇවිත්  ...අපි වතුපිටිවල ඉදලා චුටි අක්කව සංඝබෝදියටයි  මාව යටියන කනිස්ටෙටයි දැම්මා  ... පස්සේ  මහරට ආවහම  ..චූටි අක්කා මහමාය එකට දාල මාව නැලිගම කනිස්ටෙට .... මං ගොනා කියල තීරනේ කරේ කොහොමද දන්නැ අපේ මහ ඩබල ... එහෙම මූණ බලුවහම හරකෙක් කියලා දැනුනනං  අහවල් එකට ඉස්කෝලේ  දැම්මද .... මූණ බලලා දාන්ඩ තිබ්බේ ගැරිජ් එකක වැඩ පුරුදු වෙන්ඩ.

( සමහර විට ඇති දැඩිකල ඩැඩීත් මේක දකි )

ඔන්න ඔය කාලේ දවසක ලොකු අක්කා අපේ  ගෙදර ඇවිත්  ... ජෙලි හදන්ඩයි යන්නේ  .... අපිට අයිස් පෙට්ටියක් නැ  ... පාට තුනකින්ද කොහෙද පැකට් ගෙනත් .... එව්වා   හදන්නේ  මුහුදු ශාක වලින් කියලත් කියුවා .... අල්ලපු ගෙදර සේනක ඇන්ටිගේ  අයිස් පෙට්ටියට දාල මුදවලා  දෙනවද කියලත් කලින්ම අහලා තිබුනේ.

දැං ඔන්න ලොකු අක්කා  කුස්සියේ  හීටරේ  ලොකු  භාජනයකට ගහලා  ...  මම ඉස්සරහා  කෑල්ලේ ඉන්නවා , ඔය අස්සේ  අපේ චූටි අක්කා මට මොකක්හරි අලුගුත්තේරු කමක් කරලා  ...මං පයිං එකක් කෙලලා ඇරියා  .. වැදුනේ  යටි බඩට ... මේකි නැති අමාරු කමක් ඇරං  බෙරිහං දීගන ඇදගන වැටුනා  ... අපේ මව් යානේ මගේ  කර අඹන්ඩ වාගේ සෙට් වෙලා මගේ ඇගට කඩා පයිනකොට පිටි පස්සෙං  දුහලා කොහේ හරි යන්ඩ ... කියලා මං කුස්සිය පැත්තට දිහුවා ... ලොකු අක්කා  අර ජෙලි හදන්ඩ ගහපු  වතුර එක  ඉස්සරහට කරලා අල්ලගන ගෙයින් පිට උසකින්  තිබුන කුස්සියෙන් එලියට බහිනවා .... ඒ උසින්ම තිබුන  ගෙදර පිටි පස්ස දොරෙන්  මම එලියට පයිනවා  මම අඩිය තියන්නේ  අඩියක් විතර  පාතින් තියන සිමෙන්ති  පොලවට ... දොරවල් දෙක අතරේ  පරතරය අඩි තුනක් නැ

ලොකු  අක්කා  තොලකට හපාගන  එක අතකින්  ඉස්සරහට දික්කරන්  එන  ලිටර්  තුනක්  හතරක්  විතර තඩි  මහර බාල්දි පාටියේ  තලාපු  ඇල්මේනියං ජොග්ගුවටම තමයි මම පැන්නේ  ... ලොකු අක්කා ආරක්සාව සහ පරිස්සම ගැන හිතලා  අතත්  වැහෙන්ඩ  රෙද්ද දාගන හිටපු  හන්දා ( එහෙම තමයි එයා කියනවා ඇහුනේ )  හරි මොකක්හරි  හන්දා ඒකිට මොකවත්ම නොවී  අර නටන වතුර  ජොග්ගුවම මගේ  වැඩිපුර වම් පැත්තට බර වෙන්ඩ ... බෙල්ලෙං පල්ලෙහා ... චූ කුරුල්ලා  එක්කම  තේමාගන වැටුනා  ..... කෑ ගහගන  උඩ පයිනවත් එක්කම ....  මට මතක් උනේ   විදුසරේ   හෝ  විජය පත්තරේ  තිබුන ලිපියක්  ........... මම දිහුවා  අපේ  වතුර පුරවාගන්න ටැංකිය ලගට .... වේදනාව ඉවසගන නාගන නාගන ගියා  ... කලිසමත්  ගලවලා දාගන  .....  මට මතක හැටියට  ඔය පත්තරවලට  ඒ කාලේ  චානුක වත්තේගමයි  .... නාලක ගුනවර්ධනයි දෙන්නත්  ලියුවා .... පස්සේ  ඉතින්  ඔය නාන වැඩේ  ලොකු  අක්කා අනුමත කරා  ... නැත්තං  අපේ  අම්මයි අහල පහල ගෑණුයි  අනං මනං  උළලා  වැඩේ වන කරනවා  ....

පස්සේ  දැං මට හරි  වේදනාවයි  ...ලොකු  අක්කා  අලුත් රෙදි  දාල මාව ඇදේ  දැම්මා  ... අම්මද කොහෙද ගිහින් ෂර්ලි අංකල්ව එක්කං ආවා  .... එයා මේල්  නර්ස්  කෙනෙක්  ... මංගලගෙයි .... ආසිරිගෙයි   .... තාත්ත ........... උන්ගේ  අම්මා නං මෙලෝ රහක්  නැ .... ඒකට  ෂර්ලී  අංකල්  ........ ඔව් බං   ඔව්  මේල්  නර්ස්  කෙනෙක් උනාට පොන්සියෙක්  නෙමෙයි... ..එයා  මට බෙහෙත්  කලා  ... බෙල්ලේ  ඉදං  ඉනෙන්  පහලට යනකං   හම ගියා  .... රෝස පාට උනා  .... හැබැයි  අදටත්  එක කැළලක්  නැ  ... ඒ පින ෂර්ලී අංකල්ට ........ පස්සේ  එයාම තමා කියුවේ   .... අපේ  තාත්තට  ... රත්නේ  ගං කුකුලෙක්  ගෙනත්  හම ගහලා  ගෙදර හදලා  .. ගාපං කුකුල් තෙල් කියලා .............. ඒකෙන්  තමයි   කැළල් මැකුනේ

අපේ  අම්මා  ඒ වැඩේ  කලේ  මෙහෙමයි   , ෂර්ලි  අංකල්  කියුව විදිහට මේක තමයි හරි  ක්‍රමය

ගං කුකුල්  හම හොදට හෝදලා  අැල්මේනියං  තැටියක අලවනවා  , ඊට පස්සේ  තද අව්වේ  තියනවා  ... ඒවා වේලෙනකොට  ඇල කරපු කෙක් හරි රබර් රොටි හරි  තැටිය දිගේ  පාත පැත්තට බහිනවා  පිරිසිදු කුකුල්  තෙල්  ...කකාරලා ගන්න එව්වායේ  නියම ගුණය නෑලු


ඔහොම  මං ඇදේ  දපලා ඉන්නකොට අපේ චූටි අක්කා ඇවිත්  මට කියනවා

‘‘ තොට හොද වැඩේ  මට ගැහුවට තමයි  ඔය දිට්ඨ ධම්ම වේදනීයම පල දුන්නේ  කියලා ‘‘

ඔය ඔස්සේ  මං හිතුවා හැබෑටම තමන්ගේ  සහෝදරියට පය උස්සපු  නිසාද මේක උනේ  කියල , එතකොට තමයි  ... මේ   අතීත කතාව මට මතක් උනේ.  ඒකත්  ටල් අම්මලැ ගෙදරට සම්බන්දයි.

එහේ තිබුනා මේස අල්මාරියක්  ... තාමත්  ඇති මයේ  හිතේ  දැං අවුරුද්දකට විතර කලිනුත් ආතගේ  මල ගෙදර ගියාට මට මතක නැ ඒක තියද කියලා , ඒක කලුවර ලී වලින්  හදපු එකක්ද කොහෙද.... නැත්තං කුනු සහ දුං වැදිලා කලු වෙලා ඇති... පට්ට පරණ එකක්

ඒ ගෙදර හැමෝම පොත් පත් කියවනවා .... ආතා පවා ඔය පිරිත් පොත්  මන්තර පොත් වලට හෙන ලැදියි ... ටල් අම්මානං  කියවන බවක් මතක නැ ... අනිත් හැමෝම  රුවන්වැල්ල පුස්ථකාලය පාවිච්චි කරන ඩයල්.

කළු මාමගේ  රස්සාව  නිසා ඒ ගෙදරට ඕන තරං රෙස්  කොල ලැබුනා  ... ඒ නිසා වෙන පත්තරයක්  උනත්  මොකවත්  ඔතන්ඩ නොගෙන ඔය  මේස අල්මාරියේ  තමයි නතර වෙන්නේ .. පුස්තකාලයෙන්  ගේන පොත්  හැර  වෙන ගෙදරට එන ඕන දෙයක්  ඕක අස්සේ ... එහේ ඉන්න කාලේ  මට අල්ලලා යන එකක්  ලැබුනත් ඒක අස්සට ... ලොකු අක්කගේ  සමුදුර  පත්තරත්  ඕක අස්සට දානවා ...

ඉතින් එහේ ඉස්කෝලේ  යන එක නවත්තලා  අපේ ගෙදර ඉදං  ඉස්කෝලේ  යන කාලෙක නිවාඩුවට එහේ ගිහින්  වෙච්ච සීන්  එකක්  මට  දිට්ඨ ධම්ම වේදනීයම පල දුන්නද කියලා හිතුනා   චූටී අක්කාගේ  කතාවෙන්.

ඒක මෙහෙමයි  .... දැං ඔය නිවාඩු කාලේ ගමේ ගියහම .. මට ඔය ගහේ කොලේ  ඇලේ දොලේ  වැඩක්  නැත්තං  ..... කියවපු  නැති පොතක්   ගෙදර  ඉන්න අය  ගෙනත්  අතට අහුවෙන තැනක  නැත්තං .. මං අදින්නේ  ඔය මේස අල්මාරිය ... ඒක අස්සේ  තියනවා ..... ..පරණ සෝවියට්  දේශය  ..සගරා හිටං  .... ඔහොම මම දවසක්  ඇද්දා  .... කලින් පාරක  මම දාල ගිය මොකක්හරි  තියනවද බලන්ඩ.

‘‘ ටල්අම්මේ  මේ  මේක අස්සට මීයෝ  රිංගලා  ඔක්කොම කාල ‘‘

‘‘ උඹ මොකටද  ඔවවා අදින්නේ  ..මාමලගේ  පුංචිලගේ  පොත් ඔය තියෙන්නෙ‘‘

‘‘ කාගෙ උනත් වෙන්ඩ ඕන හරිය වෙලා මේ ‘‘

‘‘ඕක වහලා තියහං  ... අදින්ඩ එපා  ... උඹ ඔවා කාබාසීනියාකරලා දැම්මහම මට කනක් ඇහෙන්ඩ නැ ‘‘

‘‘ මේ නැගිටල බලන්ඩ  පැටව් හිටං දාල ‘‘

ඔන්න ඉතින්  හිරමනේ උඩ ඉදන්  කඩ කඩා උන්න කැරංකොකුද කොහෙද පැත්තකට දාපු ටල් අම්මා නැගිටලා ඇවිත්  අර මේස අල්මාරිය සුද්ද කරන්ඩ ගත්තා  .......... කාල දාපු  පොත් ටික වෙනමම බිමට දාල හොද ටික මගෙත්  උදව්වෙං  දුවිලි පිහදාල සුද්ද කරපු  අල්මාරිය අස්සේ  පිලිවලට අඩුක් කරලා  ... රෙදි පාං කඩයක්  එක්ක කොහොල්ලැ ගුලියක් ගුලි කරලා  ... මීයෝ  කාපාගන ආපු අල්මාරියේ පිටි පස්සේ  ලෑල්ලේ හිලට හිරකරලා  .... ඔන්න ඔය ටික ගෙනිහිං අගල පල්ලෙහාට විසිකරහං කියුවා.

දැං අර  විනාස කරපු කඩදාසි  ගොඩේ  රෝස පාට මී පැටව්  පස් දෙනෙකුත්  ඉන්නවා  .......... කාල තියන  පොත්  පත්තර අතරේ  මගේ  ඒවත්  තියනවා ......... තව මං කැමති ඒවත්  තියනවා  ......... වෙන විශේෂ උපදෙසක් මට ලැබුනෙත් නැ .............

මම ඔය ටික ඇරගන එන ගමං  ....... ගිනි පෙට්ටියත්  ඇරං ඇවිත් කුනු විසිකරන අගල ගාවින් තියලා ඒකට ගිනි තිබ්බා .......... ටික වෙලාවකින් චීස් පීස් ගාල මී පැටව්  පිච්චුනා  ... චුට්ටක්  විතර ඉදිමිලා  ... චුට්ටක් විතර දුඹුරු පාට උනා ... මං ඉදල ගෙනත්  ඒ ඉතුරු උන සුන් බුන්  ටික අගල පල්ලෙහාට තල්ලු කරලා දැම්මා.


2018-06-24

Presser Feet Guide Of Household Sewing machines , different presser feet that do a lot of other functions , විශේෂ කාර්ය්‍යන් සදහා භාවිතා කිරීමට ගෘහස්ථ මහන මෙෂින් සදහා නිපදවා ඇති පුට් වර්ග සහ ඒවායෙන් පහසුවෙන් මසාගතහැකි මැහුම්.

ම්  ම්  ම්  ... කොතනින්ද මේක පටන් ගන්නේ .... හොදයි  ...මෙහෙම පටන් ගමුකෝ , අදකාලේ මහන මෙෂින් එකක් සල්ලි දිලාගන්නකොට බොබින් දෙක තුනක් ඇරුනහම වෙන මොකවත් මෙෂින්  එකත් එක්ක ලැබෙන්නේ නැ , ඒ උනාට කාලෙකට ඉස්සර මහන මෙෂින් එකක් ගන්නකොට හොද කතුරක් පවා නිකං දුන්නලු ... ඒ වාගේම මෙෂින් එකත් එක්ක වෙනස් වෙනස් විදිහේ පුට් කිහිපයකුත් ලැබුනා ... හැබැයි ගොඩක් වෙලාවට ...ඒවා  මෙෂින් ලාච්චුවේ ටික කාලයක් තිබිලා ...ඊටපස්සේ  තව කොහේ හරි අස්සක ගහලා තියලා .. මලකඩ කෑවට පස්සේ  විසික්කරලා දැම්මා, එක අතකට දැං නිකං එහෙම පුට් දෙන එක නවත්තපු එකත් හොදයි ... කියල හිතෙන්නෙ ඔහොම ඒවා දැක්කහම තමා.

තව සමහරක්  අයගාව තියනවා ජපානයේ  පාවිච්චිකරලා අයින්කරලා මෙහේ ගෙනත් අළුත්වැඩියා කරල විකුණපු මැෂින්  , අන්න ඒවා එක්කත්  සමහරුන්ට හම්බෙනවා ... ඔය එක එක විදිහේ  පෙෂර් පුට් ... ගොඩක් වෙලාවට ඒවා එක්ක හම්බෙන පුට්  බොහොම සවිශක්තිමත් උසස් නිමාවක් සහිත සහ හිතාගන්ඩ බැරි තරං වැඩකෑලි සහිත ඒවා, ඒවත් අර කලින් කියුව සෙතේම තමයි.

තවත් ඔය විදිහේ ගැජට් බැජට් හම්බෙනවා පිටරටවලින් මිලදීගන්න මහන මෙෂින් එක්ක , හැම එකක් එක්කම නෙමෙයි ... උසස් තත්වයේ  මිල අධික මහන මෙෂින් එක්ක තමයි ගොඩක් වෙලාවට එහෙම ඒවා හම්බවෙන්නේ, ඒවා ගණන් වැඩිකම හන්දයි ...  මේ බලන්ඩ මම අහවල් රටේ අහවල් ෂොපින්මොල් එකෙන් ගත්තේ ... අරවා මෙච්චරක් උනා කියල පෙන්වන්ඩ ඕන නිසා පරිස්සං කරනවා මිසක්  උන්දලත් වැඩක් ගන්නේ  නැ.

ඉතින් මං හිතුවා මතක්වෙන මතක්වෙන විදිහට ඔය එක එක පුට් වර්ග ගැන ලියලා දැම්මානං හොදයි කියලා.  හරි එහෙනං  පීන්තුරයක් සමග කෙටියෙන් පුට්වර්ග ගැන මම දන්න තරමින් හැදින්වීමක් කරන්නං එහෙනං.




Straight stitch Presser foot




ඕකනං ඉතින් දන්නවනේ  , කෙලින් මහන්ඩ ගන්න එක , ගොඩක් වෙලාවට මෙෂින් එක මිලදී ගන්නකොට මේ පුට් එක තියෙන්නේ , අමතරකෑලි බෑලි දාල තියන පෙට්ටියේ හරි පොලිතින් බෑග් එකේ හරි දාල. මේකේ තියෙන්නේ  ඉදිකට්ට බහින්න කෙලින් සිදුරක්  පමනයි.




සමහරක් මාදිලි එක්ක මේ විදිහට සිහින්  ෆෙෂර් පුට් එකක් සහ , කුඩා සිදුරක් සහිත තෝත්ප්ලේට් එකක් ( නීඩ්ල් ප්ලේට් ) එකකුත් එනවා , සිග් සැග් පුට් එකෙන් සහ ප්ලේට් එකෙන් මහන්න අමාරු .. ඉතා තුනි සහ අකීකරු රෙදි මැසීමේදි මේවා භාවිතාකරන්න පුලුවන්.


බොහෝ නවතම මාදිලිවල ලෙච් එකෙන් ( පුට් එකේ ඉහල කොටස ) පුට් ප්ලේට් එක පහසුවෙන් ගැලවීමට සහ වෙනත් පුට් එකක් පහසුවෙන් සවිකිරීමට හැකි ලෙස , තෙරපීමට කුඩා පින් එකක් සහිතව නිෂ්පාදනය කර තිබෙනවා ,

මෙම පුට් එක හෝ  ප්ලේට් එක සවිකොට තිබෙන විට සිග් සැග් මෝස්තරයක් මැසීමට උත්සාහකලහොත් ඉදිකටුව සහ නිඩ්ල් ප්ලේට් එක කැඩියාමට ඉඩ තිබෙන අතර , සැම විටම කෙලින් මැස්මක් මැසීමේදි මෙම පුට් එක මාරු කිරීම අවශ්‍ය නොවන අතර ... සිග් සැග් පුට් එක මගිනුත් අදාල කාර්ය්‍යයන් කරගතහැකි බව මතක තබාගන්න.



Zig zag presser foot










මේකත් ඉතින්  ඔයාල දන්න අදුරන එකක් තමයි , මෙෂි්න් එකක්  කඩෙන් ගන්නකොට හයිකරලා තියෙන්නේ  මේක තමයි , සන්නාමය , සහ මාදිලිය වෙනස් වෙනකොට සුලු සුලු වෙනස්කං තිබුනට .. මූලිකව හැම එකක්ම ඔය වාගේ තමා. ඒ වාගේම තමයි සමහරු මේකට මල්ටිපර්පස් පුට් කියලත් කියනවා ... මූලිකව සිග්සැග් මහන්න නිර්මාණය කලාට මොකද , සමහරක්  දක්ෂ මැහුම් කාරියෝ  ... මේ කෙන් ඉන්විසිබල් ෂිපර්  ඇල්ලිල්ල , පැච්වර්ක් කිරිල්ල , වාටි මැහිල්ල පවා කරනවා ... කාගේ මෙෂින් එකක් උනත් වැඩිපුර භාවිතා කරන්නේ  මෙ පුට් එක තමයි ...  කොටින්ම කෙලින් මැහිල්ලත්  ඔය උඩින් කියුව පුට් එක නැතුවත්  යස අගේට මේකෙන්  කරන්න පුලුවන් ...  තව විශේෂ දෙයක්  තියනවා  කියන්න ... මෙෂින්  එක අළුත්  වැඩියාවට අරගන යනකොට මේ සිග් සැග් පුට් එක  අනිවාර්යයෙන් අරගන යන්න , ඔබේ මහන මෙෂින්  කාර්මිකයාට මේ පුට් එක සහ ඔබේ මහන මෙෂින් එක පිටතින් මොස්තර ඩිෂ් මාරුකරන වර්ගයක් නං , නොම්මර එක හෝ නොම්මර බින්දුව ඩිෂ් එක , ( නෝමල් සිග් සැග් ඩිෂ් එක ඔව් ඔව් කෝඩින් ඩිෂ් එක ) අරගන යන්න  , ඒ වාගෙම තමයි ... ඔබ ඒ වෙනකොට මෙෂින්  එකට භාවිතා කරන ෂටල්  එක සහ බොබින්  එකක් අරගන යන්න , භාවිතා කරන ඉදිකටු වර්ගයෙන් එකක්  මෙෂින්  එකට දාල රැගෙන යන්න , ඒ මගින්  ඔබේ කාලය සහ මුදල්  ඉතිරි වන අතර , සමහරක්විට මෙෂින් එකේ  කිසිදු වරදක් නොමැතිබව දැනගෙන ඒ වෙලාවේම ඔබේ  මහන යන්ත්‍රය කිසිදු ගෙවීමක් නොකොට රැගෙන ඒමට හැකිවේවි.




Zipper foot










මේ පුට් එක ආදාරයෙන් සාමාන්‍ය ෂිපර් ක්‍රමානුකූලව ඉතාමත් ලගින් අල්ලාගන්න පුලුවන් , සමහරක් ඒවායේ සවිවන තැන කට්ට දෙකකින් යුක්ත වනවා වම්පස ඇල්ලිමේදි වම්පසටත් දකුනු පස ඇල්ලීමේදි වම්පසටත් පුට් එක එජස්කරගැනීම සදහා.



adjustable zipper foot









මෙම පුට් එක වම්පසට සහ දකුනු පසට  සීරුමාරු කලහැකි අතර , ෂිපර් මැසීමට පමනක් නොව , මැස්මේ සිට ඔබ කැමති නිශ්ෂිත දුරකින් පයිපින් එකක් , රිබන් එකක් වැනි දෙයක් ඒකාකාරිම තබාගන මැසීමකලහැක , ( උදාහරන  බැග් එකක මැස්ම වටා ඔබ යොදන පයිපින් එකකින් වැසුන ගනකම කෝඩ් මැසීම ) , අප අපහසුවෙන් සිදුකරනු ලබන සහ අපහසුනිසා අතහැරදමන  මැහුම් බොහොමයක් කලහැකි ...එහෙත් පසකට කොට තබන බොහෝදෙනෙකු ලග ඇති උපාංගයකි.


one side foot







වම් පස සහ දකුනු පස ලෙස දෙකක් ඇති අතර ෂිපර් ඇල්ලිම සහ ඉහත සදහන්කල බොහෝ කාර්ය්‍යයන් සදහා යොදාගනු ලබන අතර , එක් නිශ්ෂිත මැස්මක් පමනක් දිගින් දිගටම කරනු ලබන අවස්තාවල මහන යන්ත්‍රයට යොදනු ලබයි.


piping foot












පයිපින් එක තුලට කොඩ් එකක් වැනි යමක් ඇතුල් කර මැසීම හෝ එසේ නොමැතිව මැසීම සදහා සහ වෙනත් සුලු සුලු වෙනස්කම් සහිතව නිෂ්පාදය කල පුට් දක්නට ලැබේ , සමහරක් ඒවායේ දකුනු පසට සහ වම්පසට වෙන වෙනම කානුවක් වැනි අදරයන් දෙකක් ඇතිව නිර්මානයකොට ඇති අතර ... සමහරුන් මේවා වයර් පුට් යනුවෙන් හදුන්වයි.


Invisible zipper foot








නමෙන්ම තේරෙනවනේ  වැඩේ , ඔය වැඩේ කරන්න බෑ හැබැයි සාමාන්‍ය ෂිපර් වලින් ඒකට ඉන්විසිබල් ෂිපර් කියලම ඉල්ලලා ගන්න ඕන , ඔය පුට් එකත් එක් එක් මාදිලි වලට සහ සන්නාමයන්ට වෙනස් වෙනස් ආකාරයෙන් නිෂ්පාදන කරලා තියනවා , ෂිපර් විතරක් නොමයි තව තව දේවල් කරගන්න පුලුවන් ඔය පුට් එකෙන් ටිකක් නිර්මාණ හීලිව හිතලා බැලුවොත්.




hemmer foot



වාටි වැනිතැන් ක්‍රමානුකුලව නවමින් මසාගැනිමට යොදාගනු ලබයි , මූලික වශයෙන් අඩියේ අදරයක් සහිත සහ රහිත වශයෙන් වර්ග දෙකකි , පුට් ප්ලේට් එකේ ග්රූ එක සහිත වර්ගය නයිලොන් කෝඩ් යොදමින් ගවුම් වාටි රැලි සහිතව මැසීම වැනි කාර්ය්‍යන්ටද, පුට් ප්ලේට් එකේ ග්රූ එක රහිත වර්ගය සාරිවාටි වැනි ප්ලැට් හෙම් මැසීමටද යොදාගනු ලබයි ,























හැඩයෙන් සහ ප්‍රමාණයෙන් මෙන්ම මැස්සේ ප්‍රමානයෙන්ද එකිනෙකට වෙනස්  බොහෝ මාදීලි දැකගැනිමට ඇත.



standard  buttonhole foot















පියවරෙන් පියවර සිලෙක්ටරයක් කරකවමින් හෝ ලිවරයක් දෙපසට හෝ උඩට පහලට කරමින් කලින් ඔබ විසින් සලකුනුකල බොත්තං කාස මැසිමට හැකි මහන මෙෂින්වලට යොදාගනි , සාමාන්‍ය හැඩය සිග්සැග් පුට් එක ලෙසින්ම දිස්වූවද  ඉදිකටුව ගමන් කරන සිදුර විශාලව සහ මැහෙන මැස්ම පහසුවෙන් දැකගත හැකි ලෙසහෝ අවර්ණව නිර්මානයකොට ඇත  , ප්‍රමාණයෙන්  සහ හැඩයෙන් බොහෝ වෙනස්කම් ඇති පුට් දැක ගැනිමට ඇත.



automatic one step buttonhole foot










නුතන ඉලෙක්ට්‍රොනික් සහ පරිගණකගත මහන මෙෂින්වල ඇත්තේ මෙම බොත්තං කාස මැහුම් ක්‍රමයයි , ඒක් පියවරකින් ස්වය්‍යක්‍රීයව තෝරාගනු ලබන මොස්තරයක බොත්තං කාසයක් පහසුවෙන් මසාගතහැකි අතර , බොත්තම් කාසය මැසියයුතු බොත්තමක් පුට් එකට සවිකල යුතු අතර ඒම ප්‍රමාණය ගනනය කර බොත්තම් කාසය මැසීම සිදුවේ , පුට් එක සවිකොට මැසීම ආරම්බකිරීමට පලමුව  පුට් බාර් එක අසල ඉහලින් ඇති ස්විචියක් සහිත බ්ටන්හොල් ලිවරය පහතට ඇද නියමිත පරිදි බට්න් හොල් පුට් එකට සම්බන්ද කල යුතුය.

මූලික සැකැස්ම සහ ක්‍රියාවලිය මෙසේ වන නමුත් , නිෂ්පාදකයා සහ මොඩලය වෙනස්වන විට සුලු සුලු වෙනස්කම් දැකගතහැක. මෙම මාදියේ මහන මෙෂින්වලින් විවිද අවශ්‍යතාවයන් සදහා විවිද මෝස්තරයෙන් බොත්තාංකාස මැසීමට හැක.



Button Attaching foot








මේ වැඩේ කරන්න කලින් පීඩ් රෙගියුලේටරය සීරෝකරන්න ඕන , ඒ කියන්නේ පීඩොක් එක ඉස්සරහට පස්සට යන එක නවත්වන්න ඕන , ඒක කරන්න සමහරක් මෙෂින්වල ෆීඩ් ඩ්රොප් ලිවර් එකක් හරි සුවිච් එකක්හරි තියනවා , එහෙම නැත්නම් මැහුම් පරතරය ඇත්කරන ලිවර් එක හරි නොබ් එක හරි බින්දුවට ගෙනත් දැති සෙට් එකේ ගමන නවත්වන්න. පීඩොක් කවර් ප්ලේට් එකක් ( එම්බෝයිඩරි ගාඩ් එකක් ) තියනවනං ඒක සවිකලහම පුට් එක අතරේ බොත්තම සහ රෙද්ද රිංගවන්ඩ ඉඩ තියනවනං ඒකත් නිඩ්ල් ප්ලේට් එකට සවිකරගත්තට කමක් නැ ,

දැං අවශ්‍ය තැනට බොත්තම තියලා පුට් එක ඒ උඩින් පහත් කරලා සිග් සැග් සීරු මාරු කරන්න බොත්තමේ සිදුරු අතරින් යන විදිහට , ඒක හොදින් පරික්ෂා කරලා බලන්න ඉදිකටුව බොත්තමේ වැදුනොත් කැඩෙනවා.

ඔය පහතම රූපය බලන්න සමහරක් බට්න් මහන පුට් වල තියනවා ඉදිරියට තල්ලු කරන්න පුලුවන් කුඩා කොටසක් , ඒකෙන් කරන්නේ බොත්තම මැහෙනකොට  යම්කිසි බුරුලක් තියාගන්න එක නුල්වල , ඒ මගින් ඇදුම ඇදිමේදි පහසුවක් ලැබෙනවා සහ මහලා ඉවර කරලා බොත්තම පුට් එකෙන් ගලවා ගැනිමේදි පහසුවක් ලබා දෙනවා ... ඔයාගේ පුට් එකේ  ඒ කෑල්ල තියනවානං ..ඒකත් ඉස්සරහට තල්ලු කරන්න.

දැන් හිමිහිට බොත්තමේ සිදුර වැහිලා යන විදිහට මහන්න , ඊලගට අර ඉදිරියට තල්ලු කරපු කොටස නැවත පසුපසට තල්ලු කරලා බොත්තම පුට් එකෙන් එලියට ඇරං බලන්න , මේ ක්‍රමයෙදි අතින් බොත්තං අල්ලනවා වාගේ  නෙවෙයි ... බොත්තම්  හොදින් රෙද්දට සවිවෙනවා.


open-toe foot








ඉදිරි පස විවෘර්තව ඇති අතර ක්විල්ට්න්ග් කිරිමේදි සහ පැච්වර්ක් කිරිමේදි භාවිතා කරනු ලබයි , ඉදිරිපස හොදින් දර්ෂනය වීම සහ ඉදිරිපස දාර දෙක ආදාරයෙන් රෙදි කැබලි හැසිරවියහැකි නිසා භාවිතයේදි මනා පහසුවක් සලසා දෙයි. විවිද මාදිලි සහ විවිද සන්නාමයන් සමග ප්ලාටික් වලින් සහ ලෝහයන්ගෙන් ප්‍රමාණයේ වෙනස්කම් සහිතව දැකිය හැක.


Quilting foot












නොවෙනස්ව එකම ප්‍රමාණයක් එකම දුරක්  පවත්වාගනිමින් මැසීමට උපකාර වෙන අතර , විවිද මාදිලි සහ විවිද වර්ග අතර වෙනස්කම් සහ , කරගතහැකි කාර්ය්‍යයන්ගේ බොහෝ වෙනස්කම් තිබෙන අතර , උපයෝගිතාවය සහ පලදායිතාවය භාවිතාකරන්නාගේ දක්ෂතාවය මත රදාපවති.



Gathering  foot











රෙදි රැලිකරමින් මැසීමට යොදාගන්නා අතර . මහන මෙෂින් වර්ගය පුට් වර්ගය , රෙදි වර්ගය මත රැලිවන ප්‍රමාණය සහ නිමාව තිරනයවේ. සීරුමාරු කිරීමට ඇනයක් ඇති  වර්ගයේ ඒවා මගින් වැඩි පලදායිතාවයක් ලබාගතහැක.




applique stitch foot










ඇප්ලික් සහ පැච්වර්ක් කිරීම සදහා යොදාගනි , සිග් සැග් පුට් එකක් මෙන් පෙනුම තිබුනද ප්‍රමානයෙන් තරමක් කුඩාවන අතර පතුලේ පැහැදිලිව පෙනෙන අදරයක් ( ගෘරූ එකක් ) සහිතය.


Darning foot















දුනු ස්ප්‍රීන්ග් එකක් සහිත මාදිලියක් කොයිල් ස්ප්‍රීන්ග් එකක් සහිත මාදිලියක් සහ ස්ප්‍රීන්ග් නොමැති වශයෙන් තුන්වර්ගයක් ඇති අතර
දුනු ස්ප්‍රීන් එකක් ඇති මාදිලිය රෙද්ද මතට සියුම් තෙරපුමක් ලබාදෙන අතර , කොයිල් ස්ප්‍රීන්ග් එකක් ඇති මාදිලිය ඉහල පහල යමින්  රෙද්ද නොසිල්වි පවත්වාගන්නා අතර ස්ප්‍රීන්ග් නොමැති මාදිලිය චලනය වීමක් සිදුනොවේ
මෙම පුට් සවිකිරිමේදි ඉහල ඇති ලිවරය නිඩ්ල් ක්ලෑම්ප් එකට හේත්තුවන ලෙස සවිකල යුතුය , ඉදිකටුව ඉහල පහල යන අවස්තාවේදි ලිවරය තල්ලු වීම මගින් රෙද්ද නිසියාකාරව හැසිරවීම සිදුවේ
රාමුව සහිතව සහ රාමුව රහිතව නිදහස්ව කෙරෙන එම්බෝයිඩර් මැස්මේදි සහ ඇප්ලික් , පැච්වර්ක් වැනි බොහෝ කාර්ය්‍යන්ට යොදාගත හැක



Knit Foot




ගොතන ලද රෙදි සහ මැසීමට අපහසු ටීෂර්ට් රෙදි ඇදෙන රෙදි වැනි අකීකරු රෙදි වර්ග මැසීමේදි යොදාගනු ලබයි , මෙහි ඉහලට තිබෙන ලිවර් එක නිඩ්ල් ක්ලැම්ප් එකට හේත්තුවන ලෙස සවිකල යුතු අතර , ඉදිකටුව ඉහල පහල යන අවස්තාවේදි ලිවරය තල්ලු වීම මගින් රෙද්ද නිසියාකාරව හැසිරවීම සිදුවේ




satin stitch foot






බැලු බැල්මට සිග් සැග් පුට් එකක් ලෙසින්ම පෙනුනද මැසිමට අපහසු සැටින් රෙදි වැනි ලිස්සන සුලු  රෙදි මැසීමට උපකාරි වන පුට් එකකි , ප්‍රමානයේ සහ හැඩයේ වෙනස්කම් ඇති මොඩ්ල් කිහිපයක් දක්නට ඇත




Stitch Guide feet







සමාන්තර ගතව සිදුකරනු ලබන මැහුම් නිවැරදි පරතරයක් සහිතව තබාගැනිම සදහා උපකාරිවන පුට් එකකි
අගල්වලින් කොටස් හෝ සෙන්ටිමීටර් වලින් කොටස් ලෙස පාධාංක සටහන්කොට ඇත.



overlock foot ( Overcast stitch foot  )


ඇත්තටම මට මේ පොස්ට් එක ලියන්න හිතුනෙත් මේ පුට් එක හන්දමයි , මේ පුට් එක ගොඩ දෙනෙක් ලග තියනවා උනත් පාවිච්චි කරන්නේ නැ , හිතේ සතුට වෙනුවෙන් මහන කෙනෙකුට , තමන්ගේ ඇදුමක් තමන්ම මහගන්න කෙනෙකුට විතරක්  නෙමයි , ඔය සාරි බ්ලවුස්  එකක් , ගවුම්ක් කලිසමක්  මහලා ගතමනාවක් ගන්න කෙනෙකුට උනත්  ඔවර්ලොක් මෙෂින් එකක් අවශ්‍ය නැ  ඇත්තටම , මේ පුට් එක මගින් ලස්සනට ඒ වැඩේ කරගන්න පුලුවන් , දවසකට ඇදුම් දෙකතුනක් මහන කෙනෙකුට උනත් ..බේබ් ඔවර් ලොක  එකක් ගන්න එක අපරාදයක් කියලයි  මම  හිතන්නේ














ඔය එක එක විදිහට තිබුනට ඔය ඔක්කොම එකයි , කරන්න තියනදේ  හරිම සරලයි  , ඉස්සෙල්ලාම ඕවර් ලොක් කරන්න තියන ටික කතුරෙන්  පිරිසිදුව කපාගන්න , ඊලගට Overcast stitch foot  පුට් එක සවිකරන්න , ඊලගට තමන්ගේ  මෙෂින්  එකේ  තියන  රෙද්දේ  කෙලවර නුල්  මැහුවට පස්සේ ගැලවිලා නොයන  ඕවර් ලොක් කලහම ලස්සනට පේන  මෝස්තරයක් තෝරලා ... වැඩිය දුරත්  නැතුව ලගත් නැතුව මැහෙන විදිහට  මැහුම් පරතරයත්  සකසලා මහන්න.

ඔබ හරියටම සිග්සැග් පරතරය සීරුමාරු කලානං , නිවරුදිම මෝස්තරය තේරුවානං , මැහුම් දෙකක් අතර පරතරය  නිවැරදි  සැකසුවානං  , ඔබේ  මිතුරියට බෑ  අදුරාගන්න මේ  ඔවර්ලොක් මෙෂින් එකකින් මහපු එකක් නෙමෙයි  කියලා අදුරගන්න.

( කතුරෙන් පිරිසිදුව රෙද්දේ අග්ගිස්ස කැපීම කරන්නම ඕන ... නැත්තං කිසි ලස්සනක් නැ )




edge joining foot










රෙදි දෙකක කෙලවර දෙකක් , රේන්දයක්  සහ රෙද්දක් මූට්ටු කිරිම වැනි  කාර්ය්‍යන් සිග් සැග් මෝස්තරයක් ආදාරයෙන් සිදුකරගැනීමට මෙය යොදාගනි




blind stitch foot










නොපෙනෙන මැස්මක් මසාගැනිමට බොහෝ විට උපකාරවෙයි , හිතන්න කලිසමක යට වාටිය ... අතින් නුල් ඇද ඇද ඉන්න ඕන නැ



walking foot







මෙම පුට් එකේ  පුට් බාර් එකට සවිවෙන කොටසට අමතරව නීඩ්ල් ක්ලැම්ප් එකට සවිවන කොටසක් සහ  පුට් ප්ලේට් එකේ පිඩොක් එක මෙන් කොටසක් තිබේ ... මෙය සවිකොට මැසිමේදි ... පීඩොග් එකට සමගාමීව පහතට පීඩනයක් හොදමින් පසුපසට තල්ලු කිරිමක් සහ ... පාලනයකින් තොරව රෙද්ද එහේ මෙහේ යාම වැලැක්වීම සිදුකරයි.

මැසීමට අමාරු නුල් පාර නොවැදෙමින් ස්ලිප් වදින අමුද්‍රව්‍ය , ලෙදර් , රෙදි තට්ටු කිහිපක් සහ මැසීමට අපහසු  ඕනැම දෙයක්  මැසීමට යොදාගත හැකි අතර , මෙහි මූලික සිද්ධාන්තය  වාණිජ මට්ටමේ  හෙවි ඩියුටි ටොප් ෆීඩින්ග් මහන මෙෂින්වල ක්‍රීයාවලියට සමානවේ.



Teflon foot










ලෙදර් සහ ප්ලාස්ටික් , පොලිතින් , රබර්වල වැනි ගතිකලක්ෂණ පෙන්වන අමුද්‍රව්‍යයන් මැසීමට යොදාගනු ලබයි , පසු පසට තල්ලු නොවීම , ලිස්සා යාම වැනි කරදර අවම වීමක් මේ මගින් සිදුවේ , ලෝහයෙන් සෑදු පුට් වලට සහයෝගය නොදක්වන සියලුම පැබ්රික් සදහා මෙය යොදාගත හැක , මැසීමට අපහසු සීරියාම්  , ඉරීයැම් , කැබලි ගැලවීම් සිදුවන අමුද්‍රවය්‍යට සාර්තක විසදුමකි.



ruffler foot













ගැදරින්ග්  පුට් එකෙන් මසාගත නොහැකි විශාල ,  ක්‍රමානුකුල , සමානුපාත රැලි මසාගැනීමට යොදාගනි , නිඩ්ල් බාර් එකේ ඉහල පහල යාම උපයෝගිකරගනිමින් රැලි සාදාදීම සිදුකරනු ලබයි



Braiding foot












රෙද්දට  මතට සීකුවින්ස් , කෝඩ් , ලේස් , වැනි ඕනැම දෙයක්  මසාගැනීමට භාවිතාකරනු ලබයි.




Double welting foot




















ගණකමින් වැඩි කෝඩ් , පබලුවැල් වැනි දැ , රෙද්ද තුල සගවමින් සහ රෙද්ද මතට මැසීමට භාවිතා කරනු ලබයි ,  එකවර  කෝඩ් දෙකක් රෙද්දට අල්ලාගත හැකි කානු දෙකකින් යුතු මාදිලියක්ද දක්නට ඇත




Bias Tape binder foot












මේ පුට් වර්ගය බයස් පයිපින් ඇල්ලීමට යොදාගන්නා අතර , පයිපින් පටිය රෝලක් ලෙස යොදමින් එකම මැස්මක් නොවෙනස්ව ලබාගැනිමේ පහසුව සලස්වයි



Cording foot










කෝඩ්  නූල් කිහිපයක් සමාන පරතරයකින් යුතුව ක්‍රමානුකුලව මසාගැනීමට උපකාරිවේ





Pintuck Foot









ටුවින්ස් නීඩ්ල් ( ඩබල් නිඩ්ල් ) සහ සිග්සැග් මෝස්තර උපයෝගී කරගනිමින් අලංකාර සමාන්තර රටා මැවීමට සහය දක්වන පුට් එකකි



Fringe foot











ඉහලට නෙරා එන ආකාරයේ  මෝස්තර නිර්මාණය කරගනු ලබන්නේ  මේ පුට් එකේ  ආදාරයෙනි




Flower stitch Foot











ඔබේ නිර්මානශීලිි හැකියාවන්  කරලියට ගෙන ඒමට පහසුවෙන් යොදාගතහැකි පුට් එකකි ,  නීඩ්ල් ක්ලැම්ප් එකේ උපකාරය ලබාගන ක්‍රීයත්මකවේ , මෙය භාවිතා කිරීමේදි ෆීඩොක් එක ස්විචය හෝ ලිවර් එක මගින් ක්‍රීයාවිරහිත කිරීම අනිවාර්යවේ.



කරුණාකර පහත  වීඩියෝව නරඹන්න








Elastic stitching foot











ඉලාස්ටික් මැසීම සදහා යොදාගන්නා අතර විවිද හැඩයෙන් සහ විවිද ප්‍රඹාණ වලින් දැක ගත හැක





Multiple Hole cording foot











කෝඩ්  නුල් රෙදි වලට ඇල්ලීමට යොදාගන්නා අතර කෝඩ්  රිංගවාගැනිමට  සිදුරු සහිතව නිර්මාණය කොට ඇත




roller foot












මැසීමට අපහසු ලෙදර් වැනි දැ මැසීමට යොදාගනු ලබන අතර , මහන යන්ත්‍රය භාවිතා කරන්නාගේ අභිමතය පරිදි මැටීරියල් හැසිරවීම සිදුකල හැක



round bead foot












පබලු වැල් සහ ඒ හා සමාන වෙනත් දැ මැසීම සදහා යොදාගනු ලබයි , පබලු වැල ගමන් කිරීම සදහා පුට් එක යටින් කානුවක් වැනි අදරයක් සමග නිමවා ඇත.

දැන් පෝස්ට් එක ටිකක් දිගයි , පින්තූරත්  සැහෙන ප්‍රමානයක් තියනවා , බ්ලොග් එකට අප්ලෝඩ් වෙයිදත් මන්දා , දැනට මතක් වෙන්නේ  මෙච්චරයි , වරින් වර මතක්වෙන පුට් වර්ගත්  මේ ලිපියටම එකතු කරන්න බලා පොරොත්තු වෙනවා , ගැටලුවක්  තියනවනං කතාකරන්න  0778707807

Popular Posts

Configure Search Box

html-generator

https://www.html.am/html-generators/image-code-generator.cfm

යාවත්කාලීන වන සිංහල බ්ලොග් අඩවි දහසක් ඇතුලත්ව ඇත , තව දුරටත් කියවීමට Show All ක්ලික් කරන්න.

ඔබගේ සිංහල බ්ලොග් අඩවිය මෙම එකතුවට ඇතුලත්ව නැත්නම් kandevidane@gmail.com වෙත දැනුම් දෙමින් සිංහල බ්ලොග් අඩවි සියල්ල එක් තැනකට එක්කිරීමට සහයෝගය දක්වන්න.

comments active links


<a href="LINK HERE"> WORDS HERE</a>