2019-09-16

බෝතාල් පත්තරේ



සෙනසුරාදා දවසක උදය වරුවේ  .....  ළමයින්ට ඉස්කෝලෙත් නැති නිසා  මම ටිකක් දවල් වෙනකං නිදි ,  නින්ද  කැඩුනා කියහංකෝ  ...  ටං ටිං ටුං .......... කියලා  බෝතල්  ගැටෙන සද්දෙකිං ,  බෝතල්  ගැටෙන හඩක් කියන්නේ   ඉතින්  මැරිලා  හිටියත් අපි  නැගිටිනවනේ බං.

මළ අතේ  තියං  නිදි ඇදේම ඉදන්  කං දුන්නා  .. අපේ නැන්දම්මාගේ  මදුර මනෝහර  කටහඩ ...... ඒ අස්සේ  අටමිගේ  සද්දෙත්  ලාවට ඇහෙනවා

හප්පේ  අමාලී  ...... මාමට හපන්නේ  බෑණා  ....... මාමගේ  කාලේ  බාගේ  බෝතල්  විතරයි  ......... මෙතන ඔක්කොම ලොකු  බෝතල්  ....... මේ කිරල  මූඩි  තියන බොතල්  ......... හැඩය වෙනස්  බෝතල්  වෙනම දාන්ඩ  ... රට අරක්කු  බෝතල්  ගන්නැ  ......... එව්වා හොදයි  පිරිත් වතුර දාන්ඩ ,  පොල් තෙල්  ගේන්ඩ   හෙම  ...........  මේ   මේ... මේ ලස්සන බෝතලේ  වතුර පුරවලා   මැසිම ගාවින්  තියාගන්ඩ  .......... මතකනේ  .ඩෙංගු  හැදිලා   ඉදලා ගෙදර එනකොට  දොස්තර  මහත්තයා කියුවා   ...... හොදට  වතුර බොන්ඩ  කියලා  ....

අනේ අම්මේ  කියවන්නේ  නැතුව  ඔය  ටික  මල්ලට දාන්ඩකෝ

ඔහොම බෑ   ...  ආදරෙන් හරි  ටිකක්  තදින් හරි  කියලා  හදාගන්ඩ ඕන  ...... පේනවනේ  තාත්තලා  .....

ඉතින් ඔයා  හදාගත්තද 

ඒක තමා මේ  කියන්නේ  ........ මේ බලන්ඩ මේ  .......... මං මේ ගැන ගැන  ගොඩ ගැහුවේ  .......... මේ හතරැස්  බෝතල්  ගන්නේ  රුපියල්  පහට ...........  මේ  කලුපාට  රවුම්  බෝතල්  .......... මේවා බියර්  නේද  ..... මල්ලි බොන්නේ   ....... මෙව්වට හතක්   දෙනවා  ............ එවා  දෙක තුනයි   මෙතන  තියෙන්නේ   .......  කහපාට කොලය  තියන ඒවා ගන්නේ  තුනට  .............  මං  මේ  නිකමට ගනං  හැදුවේ  .......... ගහලා  තියන ගානේ   හැටියට  විසිදාහක්  පැනලා  ......... හත් දෙයියනේ  ........ කෙල්ලො  දෙන්නෙක් ඉන්නේ  ........ කොච්චර  වැඩ තියද  ........ ජනේලයක්  හදන්ඩ තිබ්බා ......... මේ  රට අරක්කු  බෝතල්    කීයක්ද  කියලා  දන්නවයෑ අපි  ........... මේ  මේ  ........ මේ  බෝතලේ  බලන්ඩ  ........ සැන්ට්  කුප්පියක් වාගේ

ඕක ඔය යාලුවෙක්  ගෙනත්  දුන්න  එකක් අනේ  ..........  ගණන් කියලනං  කියුවා   දහදාහක්  විතරලු 

අනේ  මේ  පිරිමින්ට  පිස්සුද  ....ගිණිවතුර වලට මෙච්චර  වියදං  කරන්නේ ...... 

ඔව්වා  අම්මේ   ......... පරම්පරාගානක්  ....... එකම පවුලක  අය  හදන   ඒවාලු  ...........   ඒකයිලු  ඔය ගණන්  ....... ඔය රස වෙන කිසිම එකක  නෑලු  ........ ලක්ස ගණන්  වටින ඒවත්  තියනවලු  ......... ඒවා හදන විදිහ  වෙන කවුරුත්   දන්නේ  නෑලු  ....... ඒක දන්නේ   ඒ  අයගේ  පවුලේ  අය විතරයිලු  ............ ඔය ඔයතියන  පොඩි   බෝතලේ   කොලයක්  අලවලා  තියෙන්නේ  ඔය ඕක  ............ ඔය  අත්සං  කරලා  තියෙන්නේ   ......... දැන්  ඒවා  හදන  සුද්දලු

හපොයි   මේ  හැලි අරක්කු  බෝතල්ද  .......... සුද්දොත්  හැලි  අරක්කු  බොනවද  ........ ඔව්වට බොකු   දිරනවා   ළමයෝ  

දැන්නං  අහං හිටියා  හොදටම ඇති  ...... බැස්සා එලියට 

මොනවද අනේ   ඔයාල  කරන්නේ  උදේ  පාන්දර  ..නිදාගන්ඩත් නෑ ටොක ටොක ගගා

නැමේ  මෙව්වට  වතුර පිරුනහම  මදුරුවෝ   බෝවෙනවනේ  පුතේ  ........ ඒකයි  මං  බොතල්  ගන්න  ළමයට  එන්ඩ කියුවා  ......... දැන්  ඩෙංගු  බලන්ඩ  නේවී  එකෙනුත්  එනවා

ඔය  ගේ  අස්සේ තියන එව්වට  කොහොමද  වතුර පිරෙන්නේ  .........  අපරාදේ  විකුනනවනං  ....... ඌට  දෙන්නේ  ........ බියර්  බෝතල්  විසිපහට  ගන්නවා  .......... ගල් විස්සයි  ........ අනිත්වා  කඩේට ගිහින්  දුන්නොත් පහට දහයට ගන්නවා

කවුද  ළමයෝ  ඔව්වා ඇරං යන්නේ  .....

 ඉතින්  ඔයා  මල්ලක  දාගන  ඇරං   යන්ඩකෝ  වයින්  ස්ටොස්  එකට  ...... විස්සක්  ........ විසිපහක්  ගත්තහැකි 

දැන්  ඉතින්    මොකවත්  කියන්නේ  නෑ  ........  මං  කටට  එඩ්රස්  නැති  එකා උනාට   ... සමහර වෙලාවට  මගේ  වැඩ උන්දැට දිරෙව්වේ   නැති  උනාට මට  පණ ඇරලා  ......... තමන්ගේ  පුතාල  දෙන්නට  තියන  සෙනෙහස  කොහොමද  .එහෙම්ම  තමයි  මටත්  .......... එකම වෙනස  අර කොල්ලෝ   දෙන්නට  වාගේ  .........  නීති  පණවන්ඩ   එන්නේ  නෑ  .........   අටමි  හරහා  මුට්ටිය   දාලා  බලනවා හැර .......... 

ඔන්න  එනවා   ඩයල්   එක  ......... එන්ඩ කියුව  බුවා  .......... 

පරණ  හට්ටි  මුට්ටි  , කේතල්  ,  පිත්ල බඩු  , කැඩුන  ප්ලාස්ටික්  පුටු  , පරණ කොම්පියුටර්  ,  පරණ වොෂින්   මැසීන්  ............. ඔහොම   පතරන්ගයක්  කියාගන ඇවිත්  බුවා   බැස්සා  වත්තෙං

මාත්  මූව  අල්ලගන්ඩ තමා  හිටියේ   ........ බඩු  අතටම කෝට්   ......... මූ  තමයි  නැන්දම්මව  රවට්ටගන  ........  නැන්දම්ම  මාර්ගෙන්   ගෑණිවත්   ෂේප්  කරගන  ........... මං  ගෙදර නැති  අල්ල  පනල්ලේ   ...... මගේ   ඇන්ටික්   මෙෂින්    ........ අවුරුදු  බරගානක්   එකතු  කරපු  මෙෂින්   පාට්ස්  ......... තඹ , පිත්තල , අලුමීනියම් ........... ඔක්කොම  ඉස්සුවේ  ......... කොටින්ම  අවුරුදු  එකසිය පණහක්  විතර පරන   පිත්තල  ලාම්පුවක්   සහ   ....... මම  පාවිච්චි  කරපු  ......... හොදට වැඩ කරන  ....... ඉන්ග්ලන්ඩ් ...... ධමනි  ලාම්පුවකුත්  නෑ  .......... මම ගෙදර එනකොට
දැන්  අර  ඩයල්   එක එනවා   ...........  ලගටම  ...මං මග ඇරලා   ගේ අස්සට ගිහින්  ඉදලා  .......... හරියටම ගනුදෙනු   බේරනකොටම  එලියට  එනවා

ඈ මල්ලි .... ඔයාල පරණ  ඕනම දෙයක්  ගන්නවා නේද , පරණ ගෑණු  ගන්නේ  නැද්ද බං ...... දෙකක්  තියනවා දෙකම ඇරගන එකකට සල්ලි දියං

ඌත්  ලේසිපාසු  පොරක්  නෙමෙයි  ...... පිටිය බලලා  බැට් එක දාන පොරක් ... ටිකක්  ඉදලා ...  මව්යානෙයි ලූනාරෝවරෙයි  දිහාත් බලලා එහෙම ... බෝතල් ගෝනි දෙක ටාටා  බඩියට දාලා ... අත් දෙකත්  තට තට ගාලා ගසලා........... වාහනේ  ස්ටාර්ට් කරන ගමං.

'' අපි පරණ යකඩ ගත්තට බෙලෙක්ක ගන්නේ නෑ මහත්තයා ''

අපි  ලේසියට  ගෙදර තියන  කුණු  අස්කරගන්ඩ ක්‍රමයක්  සහ කීයක් හරි  ගන්ඩ  ක්‍රමයක්  විදිහට  දැක්කට  .සහ විහිලුවට ගත්තට  ......... මේක යට  තියනවා ලොකු  කතාවක්  ........... ටිකක් විතර දුකත් හිතෙන කතාවක්

ඉස්සර  ඔය  නාඩාර්  බිස්නස්  එක  තිබුනේ   දෙමළ කුල කිහිපයක්  අතේ  .... පස්සේ  ඒකට මුස්ලිම් ඩයල්   බැස්සා

ඔය වැඩේ පේනවට වැඩිය සංකීර්ණ සිද්ධියක් , දෙමල සහ මුස්ලිම් අය අතේ අනාදිමත් කාලයක්
තිබුන බිස්නස් එකට අනූගනන්වල අමුද්‍රව්‍ය හොයාගන්න අමාරුනිසා පිත්තල සහ ඇලුමීනියම් වාත්තු කරපු අය බැස්සා  , ඈත පලාත්වල ට ගිහින් පරණ බඩු එකතු කරලා උණු කරලා බඩු හැදුවා.

මගේ පාසල් මිතුරන් දෙදෙනෙක් හිටියා ඒ දෙන්නා සතියට දවස් කිහිපයක් ඔය නුවර අවට ගම්වලට ගියා තවත් වැඩිහිටියෙක් එක්ක පිත්තල එකතු කරන්න , තව මිතුරෙක් වසර  දෙකක් ෆේල් වෙලා මගේ  පන්තියටම වැටුනා ... අද ඒ  තුන්දෙනාම ලොකු සල්ලි කාරයෝ  ... පරණ ලෝහ වර්ග එකතු  කරලා .... රට පටවන අයට දෙන එක තමයි  කරන්නේ , හැබැයි  එයාල පාරම්පරික වාත්තුකාරයෝ  ........ වක්කරනවා ආයේ  .......කියන්ඩ ඇද කුද නෑ සුපිරියි.

මුල් කාලේ ඈත ඇවිදලා හොයාගන එන දේවල් උණු කරලා බඩු හැදුවා , මම දන්න ඒ වාගේ අය බොහෝ පිරිසක් ඉන්නවා.

එයාල පාරම්පරික වාත්තුකරුවෝ ......... රාගම සහ කඩවත සහ කැලණිය  ඔය අවට ගං  වාත්තු වලට ඉස්සර හරි ප්‍රසිද්ධයි , විශේෂයෙන්  කාර්මික සහ ඉදිකිරිම්  වලට අවශ්‍ය  දෑ නිෂ්පාදකයෝ ....... ඔය පිත්තල පහන් වාගේ  දේවල් නොහැදුවාමත්  නෙමෙයි. ඉස්සර  වාහනයක , මැසිමක කෑල්ලක්  උනත්  ලියවන පට්ටලේට  ඕන මූලික හැඩයට සහ  ඕනම  ලෝහයකින්  වක්කරලා දුන්නා  එයාල.

දැන් ඉන්නේ අර අමුද්‍රවය නැති නිසා නාඩාර් බිස්නස් එකට බැස්ස දෙවනි පරම්පරාව ... එයාලගේ කලින් පරම්පරාවේ බහුතරයක් වාත්තු වැඩ අත ඇරියා ........... දැන් වාත්තු රස්සාවේ ඉන්නේ කිහිප දෙනයි  අර  පට්ට වැඩ දාපු  සීයලා  , මාමලා  ගොඩක් අය වෙන රස්සාවල්  හොයාගන ... වැඩකරන්න  ලෝහ වර්ග නැති  උන එකට යුද්ධය බලපෑවාද කියලත් හිතෙනවා

ඒ පරම්පරාවල අපේ වයසේ සහ අපිට වයසින් අඩු සියල්ලන්ම වාත්තු නොකලට පරණ බඩු එකතු කරන එක කරනවා , සියලු දේ එකතු කරනවා.

ඒකෙන් ප්ලාස්ටික් සහ පොලිතින් එකතු කිරීමෙන් පසු වර්ගීකරනය කරනවා , pp , hips , hdpe ආදී වශයෙන් .... අන්න ඒ ටික   ක්‍රෂර්  වලින් කෑලි  කඩලා  ක්‍රෂ්  විදිහට හරි .......... ඒ  ක්‍රෂ් ... පෙලඩයිසර්වලට දාලා  පෙලට්  කරලා පෙලට්  විදිහට හරි ... ප්ලාස්ටික් බඩු     හදන අයට  දෙනවා

ප්ලාස්ටික් බඩු  හදන  අය  හිතුමතේ   එයාලට කැමති විදිහට  ....... වර්ජීන්  මැටීරියල්  ..... සහ  මාස්ටර් බෑජ් ..... කලවං කරලා හෝ   නැතුව  ...... ප්ලාස්ටික්  බඩු   හදලා විකුණනවා , බඩුවල කොලිටිය  කැලේ  .............ඒක හදලා  ........... හරිපාරට ගන්න  පුලුවන්  ..රට කරවන  උන්ට  උවමනාවක්  තියනවනං.


යකඩ , පිත්තල , ඇලුමීනියම් , ඊයම් , තඹ වාගේ  ලෝහ වෙන වෙනම  උණු කරලා  කුට්ටි  හදනවා , ඒවා ඉන්දියාවට පටවනවා.

අපේ තිබුන කර්මාන්තය ඉවරෙටම ඉවරයි , ලංකාවේ හදපු හයිය පිත්තල සරනේරුවක් හොයාගන්ඩ නෑ , ඇල්මේනියං  තාච්චියක්   නෑ  කඩවල්වල.ලංකාවේ හදපු .............. ඒකට  මෙහෙම  දේකුත්   බලපෑවා ........ මෙයාල   ඇල්මේනියන්  බඩු හැදුවා  ඊයම්   එහෙම  කලවං කරගන  ......... වැඩේ  වැරදියිනේ   ........... දැනුවත්  කිරීම්  ගියා  .............. දේශිය  ලෝහ   හැලි වලං  ........... ප්‍රතික්ශේප කලා මිනිස්සු ............ අන්න ඒකත් බලපෑවා ...... ෆුඩ්  ගේරේටඩ්  මැටිරිල්  වලින්  ඇර  ........ හිතෙන  හිතෙන ..... අහුවෙන  අමුද්‍රවය වලින්  උයන පිහින බාජන හදන  එක  මහ බයානක වැඩක්.

ඒ  වාගේම තමයි  ........ බලන්න  දැං   ........ හොද  පිත්තල  සරනේරුවක්  , කොන්ඩි  පට්ටමක්  , අසව්වක් , ලොක්  එකක්  ,‍  හුළං  කොක්කක්  තියද  ලංකාවේ  හදපු.

අපේ පරණ බඩු ටික ඉන්දියාවට ගිහින් ... ඊයම් සහ ඇලුමීනියම් කලවංකරපු ඉන්දියන් සරනේරු  ලංකාවට එනවා ,   අපි ගෙවල් වලට හයිකරනවා . ( ලගදි ජනෙල් දොරවල් වලට දාපු එවා බලන්න ඒවායේ පිත්තල තියද ) ........ අපේ රටේ   හදපු බඩු   ලස්සන නැතුවට  කල්ප කාලාන්තරයක්  පැවතුනා.

තවම පරක්කු නැ මේක ආපහු හරවන්න ඕන ... රට ඇතුලේ තියන ලෝහ ටික එලියට යන එක නවත්වන්න ඕන , ඒ තාක්ෂණය දන්න පරම්පරාව තාම නැතිවෙලත් නෑ , එයාල තාම ඉන්නවා , ඒ වාත්තු මඩු වාත්තු ලිප් තාම තියනවා , ඒවායේ දැන් පරණ බඩු ගොඩගහලා ,  වගකිවයුත්තන්ට  උවමනාව  තියනවනං ........ඒ වාත්තු  ලිප්  නැවත.........පත්තු  කරන්න  පුලවන්.

වරද නිවැරදි කරනවනං තවම කාලය තියනවා .... වැඩේ පටන් ගත්තොත් රටෙන් එලියට ලෝහ ගෙනියන ... දෙමළ සහ මුස්ලිම් විය්‍යපාරත් නවත්වන්න පුලුවන් ........ රට  ඇතුලේ ඉල්ලුම  හරියට හැදුවොත්  ...... එයාලට  ලෝහ රට පටවන්න  ඕන වෙන්නේ  නෑ.

ලංකාවේ පලාත් කිහිපයක පැතිරිලා තිබුන කර්මාණ්ත නැවත පණගහලා ආවොත් ........... ඉන්දියාවට අරින්න ලෝහ ඉතුරු වෙන්නේ නැ .............. දැනටත් සුලුවශයෙන් කර්මාන්තය පවතිනවා බොහෝ   පලාත්වල.

ලංකාවේ හදනවා ... ටියුබ්ලස් ටයර් උනත් දාන්න පුලුවන් ඇලෝයි ත්‍රීව්ල් රිම් , ඒවා ඉන්දියාවේ නැ ......... ඒවා   හදන්නේ ලංකාවේ  ගෙවල්වල තියන වාත්තු   මඩුවල ..අපේ පරන තාක්ෂණය සහ දැනුමෙන්.

අපි අසරණවෙලා වගේ හිතට දැනෙනවා බුදු හාමුදුරුවනේ

6 comments:

  1. සහතිකයි අටං උන්නැහේ. මේ දැනුත් අපේ ගෙදර කාමාරක් අරගන්න බැරිව සුමාන දෙකක් විතර. (තියෙන්නෙත් කාමර දෙකයි). අගුල හිර වෙලා. ලොක් ඒ තරම් සුපිරියි!

    ReplyDelete
  2. ලගදි සරනේරු ගන්න ගියා රට රටවල ඒවා බලල ආයෙ බැලුවා ලංකාවෙ හදන එකක්..තූ නොදකින් හිතුනා.ලූනු සිවිය වගේ කිසිම ෆිනිශින් එකක් නෑ එත් ලංකාවෙ නමගිය ලොකු සමාගමක් හදන එකක්.
    මේවා වෙනස් වෙන්නම ඕනි.

    ReplyDelete
  3. ++++++++++++++++++++++++++++++++++++++++++++++++++++++

    ReplyDelete
  4. අපිට කෙලවෙන්න මුල තමයි අපිට අපේ දේ අගේ නැතිවෙන එක

    ReplyDelete

කමෙන්ට් වලට ලින්ක් දාන විදිහ
<a href="LINK HERE"> WORDS HERE</a>

Popular Posts

Configure Search Box

html-generator

https://www.html.am/html-generators/image-code-generator.cfm

යාවත්කාලීන වන සිංහල බ්ලොග් අඩවි දහසක් ඇතුලත්ව ඇත , තව දුරටත් කියවීමට Show All ක්ලික් කරන්න.

ඔබගේ සිංහල බ්ලොග් අඩවිය මෙම එකතුවට ඇතුලත්ව නැත්නම් kandevidane@gmail.com වෙත දැනුම් දෙමින් සිංහල බ්ලොග් අඩවි සියල්ල එක් තැනකට එක්කිරීමට සහයෝගය දක්වන්න.

comments active links


<a href="LINK HERE"> WORDS HERE</a>